Пракуроры Мінскай вобласці за 5 гадоў накіравалі ў суды больш за 1,4 тысячы заяў аб “экстрэмісцкіх” матэрыялах

Рэдакцыя Reform.news · 19 студзеня 2026, 14:09

https://reform.news/be/prakurory-minskaj-voblasci-za-5-gado-nakiravali-sudy-bolsh-za-1-4-tysjachy-zaja-ab-jekstrjemisckih-matjeryjalah/

Пракуратура Мінскай вобласці адчыталася аб накіраванні ў суд заяў аб прызнанні інфармацыйнай прадукцыі «экстрэмісцкімі» матэрыяламі. У Беларусі абвінавачанні ў экстрэмізме рэгулярна выкарыстоўваюцца для барацьбы з палітычнымі апанентамі і іншадумствам у цэлым.

Як вынікае з паведамлення, у мінулым годзе ў суд былі накіраваныя 334 такія заявы, а за апошнія пяць гадоў — больш за 1,4 тыс.

У якасці прыкладу прыводзіцца пракурор Пухавіцкага раёна, які ў 2025 годзе накіраваў у суд 61 заяву аб прызнанні матэрыялаў «экстрэмісцкімі», а таксама ў ходзе маніторынгу распачаў крымінальную справу па артыкуле за абразу Лукашэнкі.

«У ходзе маніторынгу ўдзельнікаў і актыўных карыстальнікаў публічнага Telegram-канала для зносін у сетцы Інтэрнэт «Пухавіцкі раён LIVE чат» пракуратура раёна ўстанавіла датычнасць мясцовага жыхара да арганізацыі групавых дзеянняў, якія груба парушаюць грамадскі парадак, спалучаных з яўным непадпарадкаваннем законным патрабаванням прадстаўнікоў улады. Па выніках праверкі, якая праводзілася ў межах міжведамаснай рабочай групы, пракурор распачаў крымінальную справу па ч. 1 арт. 342 Крымінальнага кодэкса Рэспублікі Беларусь», — дадаткова паведамілі ў пракуратуры.