Дмитрий Песков. Фото: kremlin.ru
Прэс-сакратар Крамля Дзмітрый Пяскоў заявіў пра новыя кантакты прадстаўнікоў РФ і ЗША. Паводле яго слоў, яны адбыліся пасля таго, як спецпасланнік расійскага прэзідэнта Кірыл Дзмітрыеў далажыў пра свае перамовы ў Фларыдзе, і гэтая інфармацыя была прааналізаваная.
«Пасля таго, як Кірыл Дзмітрыеў далажыў пра вынікі сваёй паездкі ў Амерыку і пра вынікі сваіх кантактаў з амерыканцамі, гэтая інфармацыя была прааналізаваная. І, уласна, па даручэнні прэзідэнта Пуціна адбыліся кантакты. Адбыўся кантакт паміж прадстаўнікамі адміністрацыі Расіі і Злучаных Штатаў. Дамоўлена працягваць дыялог», — сказаў ён, перадае ТАСС.
Паводле слоў Пяскова, расійскі бок прадстаўляў памочнік прэзідэнта Юрый Ушакоў, а з амерыканскага боку было некалькі суразмоўцаў.
«Гэтага я не магу вам сказаць. Быў такі тэлефонны кантакт, вырашылі працягваць дыялог. Гэта адзінае, што мы можам сказаць. Мы па-ранейшаму лічым, што ў цяперашні момант распаўсюджванне гэтай інфармацыі можа негатыўна адбіцца на ходзе перамоўнага працэсу», — сказаў Пяскоў у адказ на просьбу распавесці пра змест размовы.
Нагадаем, сёння прэзідэнт Украіны Уладзімір Зяленскі абвясціў, што дамовіўся пра сустрэчу з прэзідэнтам ЗША Дональдам Трампам. Чакаецца, што яна адбудзецца ў нядзелю. Напярэдадні Зяленскі правёў размову з прадстаўнікамі амерыканскага прэзідэнта.