КГБ, Минск. Фото: Reform.by
Беларускіх падлеткаў, якія паступаюць на вучобу ў Польшчу, пачалі выклікаць на гутаркі ў КДБ. Пра гэта піша праваабарончы цэнтр «Вясна».
Паводле інфармацыі праваабаронцаў, гутаркі праводзяць са студэнтамі, якія ўжо вучацца ў польскіх навучальных установах, а таксама з тымі, хто афармляе дакументы для выезду на вучобу. Паведамляецца, што выклікі таксама могуць адбывацца неўзабаве пасля падачы дакументаў на атрыманне візы.
Паводле даных «Вясны», на гутаркі выклікаюць у тым ліку непаўналетніх у прысутнасці бацькоў. Супрацоўнікі КДБ цікавяцца назвай навучальнай установы, коштам навучання, прычынамі, па якіх яно можа быць бясплатным для іншаземцаў, а таксама планамі на будучыню, абранай спецыяльнасцю і колам знаёмстваў у Польшчы.
Асаблівая ўвага надаецца кантактам з іншымі беларусамі за мяжой. Падчас гутарак могуць задаваць пытанні пра аднагрупнікаў і аднакласнікаў, Telegram-чаты, прозвішчы, нумары тэлефонаў і людзей, якія знаходзяцца за межамі Беларусі, гаворыцца ў матэрыяле.
Акрамя таго, супрацоўнікі КДБ могуць праглядаць або фатаграфаваць змесціва тэлефона і перапіску ў Telegram. Пры гэтым, як сцвярджаецца, гутаркі праходзяць без ціску.
На думку праваабаронцаў, мэтай такіх сустрэч можа быць праверка магчымай датычнасці да дзейнасці, якую беларускія ўлады лічаць «дэструктыўнай». У «Вясне» лічаць, што падобная практыка становіцца ўсё больш распаўсюджанай, у тым ліку праз вялікую колькасць грамадзян Беларусі, якія навучаюцца ў польскіх ліцэях.