Нацбанк пры атэстацыі будзе ўлічваць палітычную лаяльнасць

Нацыянальны банк пастановай праўлення №370 ад 20 снежня ўнёс змяненні ў інструкцыю аб парадку правядзення ацэнкі адпаведнасці кваліфікацыйным патрабаванням і патрабаванням да дзелавой рэпутацыі, аб атэстацыі і спецыяльнай атэстацыі. Дакумент сёння апублікаваны на Нацыянальным прававым інтэрнэт-партале.

Як вынікае з пастановы, пад дзеяннямі, што дыскрэдытуюць дзелавую рэпутацыю, будуць разумець:

• удзел у несанкцыянаваных масавых мерапрыемствах, парушэнне ўстаноўленага парадку правядзення сходаў, мітынгаў, вулічных шэсцяў, дэманстрацый, пікетавання, іншых масавых мерапрыемстваў, а таксама публічныя заклікі да арганізацыі або правядзення такіх з парушэннем устаноўленага парадку іх арганізацыі або правядзення;
• удзел у любым відзе дзейнасці, накіраванай на дыскрэдытацыю Рэспублікі Беларусь, органаў дзяржаўнай улады і кіравання (уключаючы асабісты ўдзел, пасярэдніцтва або супрацоўніцтва шляхам аказання паслуг, рэгістрацыю ў экстрэмісцкіх фарміраваннях, распаўсюджанне інфармацыйнай прадукцыі, уключанай у рэспубліканскі спіс экстрэмісцкіх матэрыялаў, а таксама выраб, выданне, захоўванне або перавозку з мэтай распаўсюджання такой інфармацыйнай прадукцыі).

Інфармацыя аб дадзеных дзеяннях павінна быць пацверджана дзяржаўным органам, упаўнаважаным на ажыццяўленне мер па папярэджанні і выяўленні пагроз нацыянальнай бяспецы. Трэба адзначыць, што ў Беларусі абвінавачанні ў экстрэмізме часта выкарыстоўваюцца для барацьбы з апанентамі ўлады.

Адпаведна, наяўнасць у Нацбанка звестак аб «фактах узнікнення пагрозы прычынення або прычынення кандыдатам шкоды нацыянальнай бяспецы дзяржавы», а таксама аб «учыненні кандыдатам дзеянняў, што дыскрэдытуюць яго дзелавую рэпутацыю», будзе з’яўляцца падставай для анулявання атэстатаў.