Фото: t.me/customs_bel
Віцебскія мытнікі спынілі спробу ўвозу ў ЕАЭС дзвюх партый маторных і трансмісійных масел з Нідэрландаў з заніжаным коштам.
Тавары перавозіў казахстанскі перавозчык на двух грузавіках праз пункт пропуску «Грыгароўшчына». Як паведамілі ў Дзяржаўным мытным камітэце, у прадстаўленых дакументах былі пазначаны недакладныя звесткі пра кошт паставак, што дазваляла паменшыць суму мытных плацяжоў, якія падлягалі выплаце.
Падчас праверкі супрацоўнікі Віцебскай мытні ўстанавілі, што агульны кошт дзвюх партый перавысіў 550 тысяч беларускіх рублёў, а сума нявыплачаных мытных плацяжоў склала каля 76 тысяч рублёў.
У дачыненні да казахстанскага перавозчыка мытня пачала адміністрацыйны працэс паводле часткі 3 артыкула 15.5 КаАП. Санкцыя артыкула прадугледжвае штраф да 30% кошту прадмета адміністрацыйнага правапарушэння.