Лукашэнка ўзнагародзіў сваю нявестку прэміяй «За духоўнае адраджэнне»

19 снежня Аляксандр Лукашэнка падпісаў указы аб прысуджэнні прэміі «За духоўнае адраджэнне» і спецыяльных прэмій дзеячам культуры і мастацтва, паведамляе яго прэс-служба.

Сярод узнагароджаных — нявестка Лукашэнкі, жонка яго сярэдняга сына Дзмітрыя Ганна Лукашэнка (творчы псеўданім Ганна Сялук). Яна атрымала прэмію «За духоўнае адраджэнне» разам з мастацкім кіраўніком Маладзёжнага тэатра Уладзіславай Арцюкоўскай за канцэрт-рэквіем «Кожны трэці». У гэтым годзе Ганна Лукашэнка таксама атрымала медаль Францішка Скарыны.

Прэміі «За духоўнае адраджэнне» таксама ўдастоены:

• аўтарскі калектыў праекта «Час выбраў нас» (Іван Эйсмант, Глеб Гарбаценка і Вольга Макей),
• калектыў Сінадальнага аддзела па царкоўнай дабрачыннасці і сацыяльным служэнні Беларускай Праваслаўнай Царквы,
• калектыў ААТ «Белрэстаўрацыя»,
• маёр міліцыі Віктар Шыпкоў, старшы ўчастковы інспектар міліцыі аддзела аховы правапарадку і прафілактыкі міліцыі грамадскай бяспекі аддзела ўнутраных спраў Гомельскага райвыканкама.

Таксама прысуджаны 10 спецыяльных прэмій дзеячам культуры і мастацтва. Сярод узнагароджаных — Нацыянальны акадэмічны Вялікі тэатр оперы і балета, Брэсцкі тэатр лялек, Мастоўская раённая бібліятэка, мастацкі кіраўнік тэатра-студыі кінаакцёра Аляксандр Яфрэмаў і іншыя.