Каардынацыйная рада сфарміравала дэлегацыю беларускіх дэмсіл у ПАСЕ

Каардынацыйная рада абрала новы склад дэлегацыі беларускіх дэмакратычных сіл у Парламенцкай асамблеі Савета Еўропы. Галасаванне прайшло ў рэйтынгавым фармаце: тры кандыдаты, якія набралі найбольш галасоў, увайшлі ў асноўны склад, яшчэ трое сталі намеснікамі.

Такім чынам, у асноўны склад дэлегацыі ўключаныя:

• Павел Латушка, Кааліцыя Латушкі і Рух «За свабоду» – 291 голас;
• Уладзімір Астапенка, Кааліцыя Латушкі і Рух «За свабоду» – 256 галасоў;
• Ксенія Луцкіна, «Еўрапейскі выбар» – 205 галасоў.

Намеснікамі сталі:

• Аляксандра Мамаева, пазафракцыйная дэлегатка – 190 галасоў;
• Ганна Скрыган, Аб’яднаная грамадзянская партыя – 180 галасоў;
• Яўген Андрэйчык, «Наступ» – 159 галасоў.

Дэлегацыя беларускіх дэмсіл у ПАСЕ існуе на падставе рашэння Бюро Асамблеі ад 6 верасня 2024 года, прынятага ў выкананне пункта 12.1 рэзалюцыі 2530 «Дэмакратычная будучыня для Беларусі». Яна складаецца з трох асноўных прадстаўнікоў і трох намеснікаў. Яны могуць удзельнічаць у працы камітэтаў і падкамітэтаў ПАСЕ і выступаць з дазволу старшыні, аднак не маюць права голасу і не ўдзельнічаюць у пленарных пасяджэннях. Для іх закрыты ўдзел у трох камітэтах – Маніторынгавым камітэце, Камітэце па правілах працэдуры і імунітэтах, а таксама Камітэце па выбарах суддзяў ЕСПЧ.