Фото: CBSP
Міжнародная аперацыя пры падтрымцы Europol прывяла да затрымання 103 чалавек і ліквідацыі 36 падпольных лабараторый па вытворчасці сінтэтычных наркотыкаў. Пра гэта паведаміла еўрапейскае паліцэйскае агенцтва.
Аперацыя праходзіла з 12 па 17 лютага 2026 года і ахапіла Украіну, Польшчу і Малдову. Паводле даных праваахоўных органаў, сетка займалася вытворчасцю і збытам сінтэтычных наркотыкаў, перш за ўсё сінтэтычных катынонаў, уключаючы альфа-PVP.
Падчас каардынаваных праверак прыкладна па 510 адрасах былі ліквідаваны 36 нелегальных вытворчых аб’ектаў і 74 склады з гатовай прадукцыяй. У агульнай складанасці 129 чалавек сталі фігурантамі крымінальных спраў, 103 з іх затрыманы.
Следства мяркуе, што сетка дзейнічала на тэрыторыі некалькіх краін, уключаючы Беларусь, Малдову і Украіну.
Меркаваным арганізатарам называюць грамадзяніна Украіны, які, паводле версіі праваахоўных органаў, ствараў і аснашчаў лабараторыі, а таксама каардынаваў пастаўкі прэкурсораў і абсталявання праз легальныя бізнес-структуры. Следчыя лічаць, што ён меў устойлівыя сувязі з польскімі злачыннымі групамі.
У выніку аперацыі канфіскаваны дзясяткі тон хімічных рэчываў і сотні кілаграмаў наркотыкаў, уключаючы больш за 229 кілаграмаў альфа-PVP, 156 кілаграмаў амфетаміну і звыш 67 кілаграмаў мефедрону. Таксама канфіскаваны наяўныя сродкі ў розных валютах, віртуальныя актывы і 41 транспартны сродак.
Паводле даных Europol, удзельнікі сеткі выкарыстоўвалі легальныя кампаніі для імпарту хімічных рэчываў, у тым ліку прэкурсораў, якія на момант паставак не падпадалі пад кантроль. Такая схема дазваляла размеркаваць рызыкі і ўскладняла выяўленне дзейнасці лабараторый у розных краінах.
У Europol падкрэслілі, што агенцтва забяспечвала аналітычную і аператыўную падтрымку, уключаючы абмен данымі ў рэжыме рэальнага часу. У аперацыі ўдзельнічалі праваахоўныя органы Украіны, Польшчы і Малдовы, а таксама мытныя і памежныя службы.