Фото: t.me/customs_bel
Супрацоўнікі Мінскай рэгіянальнай мытні выявілі 54 баявыя патроны ў легкавым аўтамабілі, увезеным праз літоўска-беларускую мяжу.
Транспартныя сродкі прыбылі ў складзе аўтавоза, мытныя аперацыі праводзіліся ў пункце мытнага афармлення «Калядзічы-аўто». Падчас дагляду аўтамабіля Buick Encore супрацоўнікі кіналагічнага аддзела выявілі схаваны пакет белага колеру з патронамі.
Боепрыпасы былі схаваныя ў тэхналагічнай поласці багажніка. Паводле знешняга выгляду ўстаноўлена, што яны прызначаны для стральбы з гладкаствольнай зброі.
Патроны накіравалі на экспертызу ў Дзяржаўны камітэт судовых экспертыз, дзе пацвердзілі іх прыдатнасць для стральбы.
У сувязі з перамяшчэннем боепрыпасаў узбуджана крымінальная справа па частцы 1 артыкула 333-1 Крымінальнага кодэкса Беларусі, паведамілі ў прэс-службе Мытнага камітэта.