Фото: Госдепартамент США
Дзяржсакратар ЗША Марка Рубіа і міністр замежных спраў Арменіі Арарат Мірзаян па выніках перамоў у Вашынгтоне абвясцілі рамкавы план рэалізацыі праекта «Маршрут Трампа ў імя міжнароднага міру і росквіту» (TRIPP). Ён з’яўляецца часткай дамоўленасцяў, заключаных у жніўні гэтага года паміж ЗША, Арменіяй і Азербайджанам.
TRIPP павінен злучыць Азербайджан і Нахічэванскую АР праз тэрыторыю Арменіі.
У дакуменце гаворыцца, што Арменія абавязуецца аказваць падтрымку і садзейнічанне Кампаніі па развіцці TRIPP, забяспечыць каардынацыю працы дзяржаўных органаў краіны, садзейнічаць своечасоваму атрыманню неабходных дазволаў і ўзгадненняў, працаваць над рэгіянальнай нармалізацыяй, а таксама распрацаваць працэсы пропуску асоб, транспартных сродкаў і грузаў па транспартным калідоры.
Стварэннем і развіццём інфраструктуры зоймецца Кампанія па развіцці TRIPP. Яна будзе кантралявацца ЗША. У дакуменце гаворыцца, што Арменія прапануе ЗША долю ў кампаніі ў 74%, а 26% застанецца за Ерэванам. Мяркуецца, што гэта пагадненне будзе падоўжана яшчэ на 50 гадоў з павелічэннем долі Арменіі да 49%. У дакуменце таксама вызначаюцца рамкавыя ўмовы працы кампаніі.
“Мы лічым, што пагадненне TRIPP сапраўды стане ўзорам для ўсяго свету таго, як можна адкрыцца для эканамічнай актыўнасці і росквіту, ніякім чынам не ставячы пад сумнеў свой суверэнітэт і тэрытарыяльную цэласнасць. Мы думаем, што гэта будзе выдатна для Арменіі, выдатна для Злучаных Штатаў, выдатна для ўсіх удзельнікаў, але ў канчатковым выніку гэта стане ўзорам для ўсяго свету. І мы поўныя рашучасці і сёння робім важныя крокі для далейшага прасоўвання ў гэтым кірунку”, — заявіў Рубіа.