ЗША пачалі вывад ратацыйных падраздзяленняў з Літвы. Пра гэта паведамляе BNS. Кадэнцыя чарговага падраздзялення падыходзіць да завяршэння. Пры гэтым калі прыбудзе ім на змену новае, літоўскі бок не ведае, як і колькасць новага падраздзялення.
Агенцтва спасылаецца на некалькі крыніц у абаронным ведамстве, а таксама галоўнага дарадцу прэзідэнта краіны Дэйвідаса Матулёніса. Апошні запэўніў, што Літва атрымала ад ЗША пацвярджэнне захавання ў краіне амерыканскага кантынгенту.
«Мы атрымалі ад амерыканцаў вельмі выразныя запэўненні ў тым, што салдаты былі і застануцца, але я не магу сёння назваць канкрэтную колькасць. Ратацыя амерыканскіх салдат звязаная з лагістыкай, таму цалкам натуральна, што магчымыя пэўныя прамежкі часу.
Мы давяраем амерыканцам, мы з’яўляемся блізкімі стратэгічнымі партнёрамі, і пытанне размяшчэння амерыканскіх войскаў на ўсходнім флангу НАТА добра зразумела як амерыканскім вайскоўцам, так і Пентагону. Мы ставімся да сітуацыі дастаткова спакойна і не бачым неабходнасці ў дадатковых абмеркаваннях з гэтай нагоды», — цытуе яго агенцтва.
BNS адзначае, што ў апошнія гады ратацыйнае размяшчэнне амерыканскіх падраздзяленняў у Літве было бесперапынным, гэта значыць, калі падраздзяленне, якое адбыло сваю кадэнцыю, адпраўлялася дадому, яму на змену ўжо прыбывалі вайскоўцы з наступнага.
Звычайна ЗША размяшчалі ў Літве ўзмоцненыя батальёны колькасцю больш за 1000 чалавек, у тым ліку з цяжкім узбраеннем.
Дапоўнена
Робертас Каўнас заявіў, што атрымаў запэўненні ад Злучаных Штатаў аб тым, што амерыканскія салдаты, якія завяршаюць сваю ратацыю, будуць заменены новымі.
«Войскі будуць, але калі менавіта, з якімі магчымасцямі, у якім маштабе, мы пра ўсё гэта абвесцім», — заявіў міністр журналістам.
Паводле яго слоў, ён абмяркоўваў гэтае пытанне з кіраўніком Пентагона ў Сінгапуры.
