Фото: Mika Baumeister, unsplash.com
Абаненты мабільнага аператара A1 не могуць зарэгістравацца ў мэсэнджары Signal, паведамляе «Бюро».
Пры рэгістрацыі ў мэсэнджары неабходна ўвесці шасцізначны код, які прыходзіць праз смс-паведамленне. Але A1 абмяжоўвае магчымасць атрымання кода. У кліентаў МТС і Life такой праблемы няма.
Пры спробе рэгістрацыі кліенты A1 атрымліваюць наступнае паведамленне: «Signal не ўдалося адправіць смс-код з-за праблем з пастаўшчыком смс-паведамленняў».
«Бюро» звязалася з тэхпадтрымкай A1 пад выглядам занепакоенага карыстальніка, але там паведамілі, што нічога не блакіруюць.
«Кампанія [A1] не блакіруе працу прыкладанняў, мэсэнджараў і сацыяльных сетак», — заявілі ў A1.
Signal лічыцца самым бяспечным мэсэнджарам, бо выкарыстоўвае end-to-end шыфраванне для ўсіх чатаў. Гэта не дазваляе распрацоўшчыкам або трэцім асобам атрымаць доступ да перапіскі карыстальнікаў.