Азербайджан заявіў аб прадухіленні тэрактаў, падрыхтаваных КСІР

Рэдакцыя Reform.news · 7 сакавіка 2026, 11:01

https://reform.news/be/azerbajdzhan-zajavi-ab-praduhilenni-tjerakta-padryhtavanyh-ksir/

Служба дзяржаўнай бяспекі Азербайджана заявіла аб нейтралізацыі арганізаванай злачыннай групы, якая рыхтавала тэракты ў Баку. Паводле сцвярджэння СДБ, група дзейнічала па заданні Корпуса вартавых ісламскай рэвалюцыі Ірана.

Мэтамі меркаваных атак, згодна з заявай ведамства, павінны былі стаць нафтаправод Баку — Джэйхан і іншыя стратэгічныя аб’екты, пасольства Ізраіля, адзін з лідараў абшчыны горскіх яўрэяў, ашкеназская сінагога і прадстаўнікі рэлігійных абшчын краіны. Паводле дадзеных СДБ, члены КСІР увезлі ў Азербайджан тры выбуховыя прылады, аднак спецслужбам удалося прадухіліць іх перадачу трэцім асобам. Восем грамадзян Азербайджана затрыманыя па падазрэнні ў супрацоўніцтве з КСІР.

Нагадаем, 5 сакавіка ў Нахічэвані ў раёне аэрапорта выбухнулі беспілотнікі. МЗС Азербайджана асудзіла атаку Ірана. У сваю чаргу ў Іране заявілі, што не атакавалі тэрыторыю Азербайджана.