Ад цяжкай хваробы ў Варшаве памерла мастачка Ніна Маргаева. Трагічную навіну Радыё Свабодзе пацвердзілі блізкія творцы.
Ніне Маргаевай было 40 гадоў.
У студзені 2023 года ў жанчыны быў дыягнаставаны бакавы аміятрафічны склероз (БАС) — рэдкае і невылечнае захворванне, што абмяжоўвае рухальную актыўнасць і патрабуе пастаяннай медыцынскай дапамогі. Хвароба прагрэсавала.
Ніна Маргаева нарадзілася ў 1984 годзе. У 2007-м скончыла Беларускі дзяржаўны ўніверсітэт культуры і мастацтваў па спецыяльнасьці «народныя рамёствы» (спецыялізацыя — кераміка).
З 1997 года Ніна пачала актыўна ўдзельнічаць у мастацкіх выставах і пленэрах.
У Мінску творца заснавала дзіцячую мастацкую студыю PLOT. Потым арандавала майстэрню і цягам 7 гадоў працавала з дзецьмі і дарослымі.
Пасля прэзыдэнцкіх выбараў 2020 года Ніна Маргаева падпісала «Адкрыты ліст дзеячаў культуры і мастацтва супраць гвалту і фальсіфікацыі выбараў». На мастачку пачаўся ціск, і ў чэрвені 2022 года яна была вымушаная з’ехаць з Беларусі з сынам Міронам і спаніэлем па мянушцы Хлоя.
У кастрычніку 2022 года ў Варшаве Ніна Маргаева запусціла новы праект «Glieba». Заняткі з дзецьмі праходзілі ў Музеі Вольнай Беларусі ў Варшаве.
Калі стала вядома пра цяжкую хваробу Ніны, яе калегі і сябры, а таксама Беларуская Рада культуры абвясцілі тыдзень салідарнасці з творцай і збор на лячэнне ды яе падтрымку.
У кастрычніку 2024 года ў Музеі Вольнай Беларусі прайшла выстава аўтаркі «Крок насустрач», дзе можна было набыць яе працы. Таксама ў межах выставы была арганізавана дабрачынная выстава-продаж твораў сяброў і калег Ніны.
У працах Ніны Маргаевай колер і форма паводзяць сябе нечакана: цёплыя і халодныя адценні змяняюць настрой у залежнасці ад таго, як доўга глядач углядаецца ў выявы. Сузіранне і цішыня, што ўтварае ўнутраны рух, — асноўны матыў яе творчасці.
Малюнкі Ніны адлюстроўвалі і адлюстроўваюць глыбокі погляд на штодзённае жыццё, ператвараючы звычайныя краявіды, простыя формы і прадметы паўсядзённасці ў знакі асабістых эмоцый. Праз простыя прадметы мастачка паказвала, як звычайнае становіцца люстэркам унутраных перажыванняў.
Падпісвайцеся на культурныя навіны Reform.news у Telegram