Палявыя работы на тэрыторыі Заслаўскага замка пачаліся 2 чэрвеня пад кіраўніцтвам Івана Спірына. Сёння тэлеграм-канал Інстытута гісторыі НАН Беларусі паведаміў, што падчас раскопак быў раскапаны ўваход у меркаваны падземны ход.
У свой час гэтую канструкцыю назваў «падземным ходам» доктар гістарычных навук, галоўны навуковы супрацоўнік аддзела археалогіі сярэднявечнага перыяду Інстытута гісторыі НАН Беларусі Георгій Штыхаў, які праводзіў тут раскопкі ў 1972 годзе.
Цяпер даследчыкі ўдакладняюць яго прызначэнне. Ход знаходзіцца каля праезду да брамы XVI стагоддзя. Археолагі расчышчаюць праезд у браму замка з мэтай яго далейшай кансервацыі і музеефікацыі. Мяркуецца, што брама стане музейным аб’ектам.
Заслаўскі замак — адно з першых бастыённых умацаванняў на тэрыторыі Беларусі, пабудаваны ў сярэдзіне XVI стагоддзя магнатамі Глебавічамі. Замак размяшчаўся на высокім пагорку і з усіх бакоў быў акружаны ровам. Земляныя бастыёны былі выкладзены каменем і цэглай. Адзіны ўваход у замак быў з паўднёвага боку праз двухпавярховую браму, якая мела каменныя сцены двухметровай таўшчыні. Да брамы праз роў вёў драўляны мост. Подступы да іх прастрэльваліся з размешчаных побач бастыёнаў.
Падпісвайцеся на культурныя навіны Reform.news у Telegram
