Скриншот видео
Золатавалютныя рэзервы Беларусі дасягнулі 14,3 млрд долараў. Такія даныя ў інтэрв’ю беларускаму тэлебачанню прывёў старшыня праўлення Нацбанка Раман Галоўчанка. Афіцыйную інфармацыю аб рэзервовых актывах Нацбанк павінен апублікаваць на наступным тыдні.
«Апошняя лічба, якую я магу агучыць, — гэта 14,3 млрд долараў. Для разумення. Чаму яны называюцца рэзервы? Гэта падушка бяспекі нашай краіны. Яна можа быць задзейнічана, скажам так, для аплаты імпарту ў выпадку чаго. Дарэчы, мы ўпершыню перасягнулі такі парог, як трохмесячны запас рэзерваў для пакрыцця трохмесячнага імпарту. Гэта такі міжнародны прынцып, які…
Паказчык, што характарызуе ўстойлівасць краіны. Безумоўна, рост сусветнага кошту золата ўнёс у гэта істотны ўклад. Але, як я ўжо казаў у пачатку нашай з вамі размовы, мы таксама назапасілі і нашы валютныя рэзервы менавіта за кошт таго, што і прадпрыемствы, і фізічныя асобы выступалі актыўнымі прадаўцамі валюты на ўнутраным рынку. Таму думаю, што ў наступным годзе гэтая тэндэнцыя таксама працягнецца», — сказаў ён.
У пачатку месяца ў Нацбанку паведамлялі, што па стане на 1 снежня ЗВР Беларусі склалі 13,9 млрд долараў. Такім чынам, згодна з інфармацыяй Рамана Галоўчанкі, на працягу гэтага месяца яны павялічыліся яшчэ прыкладна на 400 млн долараў.