Фото: t.me/V_Zelenskiy_official
Прэзідэнт Украіны Уладзімір Зяленскі распавёў пра трохбаковыя перамовы паміж ЗША, Расіяй і Украінай, якія прайшлі ў Абу-Дабі. Ён адзначыў, што гэта быў першы за доўгі час фармат двухдзённых трохбаковых сустрэч, і абмеркаванні, паводле яго слоў, насілі «канструктыўны» характар.
«Быў даклад нашай дэлегацыі: сустрэчы ў Эміратах завяршыліся. І гэта першы такі фармат за даволі доўгі час — двухдзённыя трохбаковыя сустрэчы. Шмат што паспелі абмеркаваць, і важна, што размовы былі канструктыўнымі», — заявіў украінскі лідар.
Ён адзначыў, што ў перамовах прымалі ўдзел прадстаўнікі ваенных ведамстваў усіх трох бакоў. Украінскую дэлегацыю прадстаўлялі міністр абароны Рустэм Умераў, кіраўнік Галоўнага ўпраўлення разведкі Кірыл Буданаў, камандуючы Аб’яднанымі сіламі Андрэй Гнатаў, народны дэпутат Давід Арахамія, пастаянны прадстаўнік Украіны пры ААН Сяргей Кісліца і намеснік начальніка ГУР Вадзім Скібіцкі. З боку ЗША ўдзельнічалі Стывен Уіткаф, Джарэд Кушнер, Дэніел Дрыскол, Алекс Грынкевіч, Джош Грунбаум. Расію прадстаўлялі супрацоўнікі ваеннай разведкі і арміі.
«Галоўнае, на чым засяродзіліся абмеркаванні, — гэта магчымыя параметры заканчэння вайны. Вельмі цаню, што ёсць усведамленне неабходнасці амерыканскага маніторынгу і кантролю за працэсам заканчэння вайны і выкананнем рэальнай бяспекі. Амерыканскі бок уздымаў пытанне магчымых фарматаў зацвярджэння параметраў заканчэння вайны і неабходных для гэтага ўмоў бяспекі», — праінфармаваў ён.
Паводле вынікаў сустрэч бакі дамовіліся далажыць пра вынікі перамоў у сваіх сталіцах і ўзгадніць далейшыя крокі з лідарамі. Ваенныя таксама вызначылі пералік пытанняў для магчымай наступнай сустрэчы. Пры гатоўнасці працягваць дыялог, падкрэсліў Зяленскі, новыя перамовы могуць адбыцца ўжо на наступным тыдні.
«Пры ўмове гатоўнасці рухацца далей — а Украіна гатовая — адбудуцца наступныя сустрэчы, і патэнцыйна — на наступным тыдні. Чакаю асабістага дакладу дэлегацыі па яе вяртанні. Удзячны ААЭ і асабіста спадарову прэзідэнту Эміратаў за пасярэдніцтва і гатоўнасць прымаць далейшыя сустрэчы. Украіна працуе дзеля міру і бяспекі. Дзякуй усім, хто дапамагае», — падсумаваў Зяленскі.