Скриншот видео
Прэзідэнт Украіны Уладзімір Зяленскі, прэзідэнт Францыі Эманюэль Макрон і прэм’ер-міністр Вялікабрытаніі Кір Стармер падпісалі дэкларацыю аб намерах адносна разгортвання шматнацыянальных сіл для падтрымкі абароны, аднаўлення і стратэгічнай устойлівасці Украіны. Дакумент падпісаны сёння ў Парыжы па выніках сустрэчы «кааліцыі жадаючых».
На прэс-канферэнцыі Макрон заявіў, што ўдзельнікі кааліцыі пагадзіліся стварыць каардынацыйны цэнтр пры аператыўным штабе кааліцыі для ўзмацнення ўзаемадзеяння паміж Украінай і кааліцыяй.
«Па-першае, мы заклалі асновы маніторынгу выканання рэжыму спынення агню пад кіраўніцтвам ЗША, але з удзелам краін кааліцыі, якія пацвердзяць свой удзел у механізме. Па-другое, падтрымка Украіны, Узброеных сіл Украіны, якія з’яўляюцца першай лініяй абароны для стрымлівання агрэсіі. Гэта будзе фармат 700 тысяч вайскоўцаў украінскай арміі, і яе трэба будзе матэрыяльна забяспечыць, каб яна магла стрымліваць патэнцыйную агрэсію. Далей — працягнуць нашу падрыхтоўку арганізацыі шматнацыянальных сіл з разгортваннем у паветры, на моры і на сушы, каб забяспечыць гарантыі бяспекі пасля спынення агню», — распавёў Макрон пра вынікі перамоў.
Таксама, паводле слоў Макрона, бакі абмяркоўвалі, як юрыдычна замацаваць абавязацельствы падтрымкі Украіны ў выпадку новага нападу з боку Расіі.
Зяленскі заявіў, што падпісаныя сёння дакументы з’яўляюцца сігналам таго, наколькі сур’ёзна Еўропа гатова працаваць над бяспекай. Паводле слоў Зяленскага, бакі вызначылі, якія краіны гатовыя браць лідарства ў гарантаванні бяспекі на сушы, у паветры, на моры і ў аднаўленні Украіны, вызначылі, якія сілы неабходныя, і як і на якіх узроўнях яны будуць кіравацца.
Зяленскі заявіў, што Украіна валодае дэталямі адносна «размяшчэння сіл, колькасці, канкрэтных відаў узбраення, складнікаў узброеных сіл, якія неабходныя і змогуць спрацаваць».
«Мы разумеем, якая краіна і на што гатова — з усіх краін “кааліцыі жадаючых”», — сказаў ён.
Таксама, паводле слоў Зяленскага, ЗША гатовыя працаваць у пытанні маніторынгу спынення агню.
«Мы вельмі прадметна гаварылі з амерыканскім бокам па пытанні маніторынгу, каб не было парушэнняў міру. Амерыка гатова працаваць у гэтым кірунку», — заявіў ён.
Стармер заявіў, што пасля перамір’я Вялікабрытанія і Францыя пабудуюць вайсковыя хабы па ўсёй Украіне.
Канцлер Германіі Фрыдрых Мерц паабяцаў, што Германія возьме на сябе адказнасць за бяспеку Украіны і ўсяго кантынента пасля ўсталявання міру.