Фото: pixabay.com
Савет міністраў Беларусі пастановай №423 ад 20 жніўня зацвердзіў палажэнне аб парадку арганізацыі выезду непаўналетніх грамадзян за межы краіны.
Дзеянне дакумента распаўсюджваецца на арганізацыю выезду дзяцей на лячэнне, міжнародныя мерапрыемствы, конкурсы, выставы і г. д., за выключэннем міжнародных мерапрыемстваў, у якіх непаўналетнія грамадзяне бяруць удзел ад імя Рэспублікі Беларусь.
Выезд арганізаванай групы магчымы пры наяўнасці ўзгаднення дзяржоргана. Узгадняць выезд будуць Міністэрства адукацыі, Міністэрства культуры, Міністэрства спорту, Рэспубліканскі цэнтр па аздараўленні і санаторна-курортным лячэнні насельніцтва (Цэнтр), аблвыканкамы і Мінгарвыканкам у залежнасці ад характару мерапрыемства і мэт паездкі.
Для атрымання ўзгаднення арганізатар павінен не пазней чым за 30 дзён да даты выезду накіраваць у аблвыканкамы, Мінгарвыканкам або Цэнтр ліст аб выездзе арганізаванай групы з абгрунтаваннем мэтазгоднасці накіравання, указаннем міжнароднага мерапрыемства, месца яго правядзення, тэрмінаў, мэты і інш. У выключных выпадках дапускаецца накіраванне ліста ў больш кароткі тэрмін.
Да ліста патрабуецца прыкласці запрашэнне арганізатара мерапрыемства пры яго наяўнасці, інфармацыю аб арганізатары паездкі, палажэнне, рэгламент або іншы дакумент аб правядзенні міжнароднага мерапрыемства, яго праграму, спіс удзельнікаў групы, інфармацыю аб крыніцах фінансавання паездкі, маршрут руху да месца правядзення мерапрыемства і назад з указаннем віду транспарту і месца пражывання, пісьмовыя згоды законных прадстаўнікоў непаўналетніх, копіі страховак кожнага з непаўналетніх.
Дзяржорганы павінны на працягу 5 працоўных дзён разгледзець атрыманыя дакументы. Пры гэтым у выключных выпадках разгляд можа прайсці на працягу аднаго дня. Тэрмін разгляду таксама можа быць падоўжаны да 10 дзён.
Аблвыканкамы, Мінгарвыканкам і Цэнтр пасля разгляду дакументаў накіроўваюць іх у профільны дзяржорган. Ім даецца яшчэ пяць дзён на разгляд дакументаў і прыняцце рашэння аб узгадненні паездкі.
Падставамі для адмовы ва ўзгадненні з’яўляюцца неспрыяльная эпідэміялагічная, іншая абстаноўка ў краіне ўезду (краіне маршруту руху да месца правядзення міжнароднага мерапрыемства і назад) арганізаванай групы, немагчымасць на якасным узроўні засвоіць змест адукацыйных праграм, невыкананне тэрміну для ўзгаднення выезду.
Пастанова прынята праз два месяцы пасля атакі на аўтобус з беларускімі дзецьмі ў Бранскай вобласці Расіі. 17 чэрвеня аўтобус з беларускімі дзецьмі, якія накіроўваліся на адпачынак у расійскі Геленджык, трапіў пад удар беспілотніка. У выніку загінула жанчына, якая суправаджала групу, восем чалавек, у тым ліку шасцёра дзяцей, атрымалі раненні. Масква заявіла, што аўтобус быў атакаваны ўкраінскім дронам, Кіеў адхіліў гэтыя абвінавачанні і назваў тое, што адбылося, інфармацыйнай правакацыяй.
Пасля інцыдэнту Аляксандр Лукашэнка прапанаваў узяць арганізаваныя паездкі дзяцей за мяжу пад дзяржаўны кантроль.