Скриншот видео
Жаданне стварыць у Беларусі крыптабанк выказалі некалькі інвестараў. Пра гэта ў інтэрв’ю беларускаму тэлебачанню расказаў першы намеснік начальніка сакратарыята назіральнага савета Парка высокіх тэхналогій Дзмітрый Калечыц. Указ аб крыптабанках уступае ў сілу з 18 ліпеня. Але яшчэ без яго крыптарэзідэнты ПВТ прыцягнулі да паўмільярда рублёў.
«Сапраўды, ужо заявілі пра сваё жаданне некалькі інвестараў па арганізацыі праекта банка — і нашых айчынных інвестараў, і з краін Еўразійскай эканамічнай супольнасці, а таксама з краін далёкага замежжа. І мы спадзяёмся, што ўсе гэтыя планы з улікам тых крокаў, якія робяцца з боку дзяржавы, з боку Парка высокіх тэхналогій, усё гэта адбудзецца ўжо ў бягучым годзе», — сказаў ён.
Паводле яго слоў, ужо цяпер крыптарэзідэнты парка прыцягнулі каля 500 млн рублёў сродкаў ад беларускіх грамадзян.
«Наш крыптасектар выконвае функцыю фінансавага пасярэдніцтва, па сутнасці, дапаўняючы традыцыйныя фінансы, ужо больш, напэўна, чвэрці мільёна нашых грамадзян з’яўляюцца кліентамі нашых крыптарэзідэнтаў. Каля паўмільярда беларускіх рублёў ужо там засяроджана.
Гэта значыць, інвестыцыйная і ашчадная функцыя, якую выконваюць нашы рэзідэнты для нашых грамадзян, ужо мае дастаткова вялікія маштабы. Больш за 200 тыс. кліентаў — гэта нерэзідэнты нашых суб’ектаў, нашых крыптарэзідэнтаў, якія таксама захоўваюць дастаткова значныя аб’ёмы сваіх зберажэнняў, актываў у нашай краіне ў нашых крыптарэзідэнтаў. Тым самым гэтыя рэсурсы працуюць на нашу эканоміку», — сказаў ён.
У ПВТ цяпер зарэгістравана 26 крыптарэзідэнтаў, у тым ліку 10 біржаў, 13 брокераў, два аператары ICO і адзін крыптаабменнік. Па выніках апошняга пасяджэння назіральнага савета ПВТ у лік крыптарэзідэнтаў прыняты яшчэ тры кампаніі.
«Абарот расце, абарот расце даволі, я б сказаў так, нават экспаненцыяльна, паколькі менавіта ў мінулым годзе з’явілася дастатковая колькасць новых крыптарэзідэнтаў, і ў бягучым годзе ідзе павелічэнне. І мы чакаем, што па выніках бягучага года ў параўнанні з папярэднім годам гэты абарот можа павялічыцца нават у паўтара-два разы», — сказаў ён.