У Польшчы спынілі дзейнасць групы, якая займалася падробленымі даведкамі аб вучобе

Рэдакцыя Reform.news · 29 кастрычніка 2026, 11:22

https://reform.news/be/u-polshchy-spynili-dzejnasc-grupy-jakaja-zajmalasja-padroblenymi-davedkami-ab-vuchobe/

Польская Памежная ахова спыніла дзейнасць арганізаванай злачыннай групы, якая займалася даведкамі аб статусе студэнта альбо навучэнца паліцэальнай школы (аналаг прафесійнай навучальнай установы). Яе кліентамі былі грамадзяне Беларусі, Украіны, Малдовы і Грузіі ва ўзросце да 26 гадоў. Такія дакументы даюць права на некаторыя льготы ў Польшчы, у тым ліку падатковыя, напрыклад, вызваляюць ад узносаў сацыяльнага страхавання. Акрамя таго, яны маглі выкарыстоўвацца для атрымання віду на жыхарства і дазволаў на працу.

Справа расследавалася з 2024 года. Сама група дзейнічала з чэрвеня 2022 года па канец 2025 года. Яна прапаноўвала даведкі ад пяці ўкраінскіх вышэйшых навучальных устаноў, а таксама ад дзвюх польскіх паліцэальных школ. Пакет дакументаў каштаваў ад 230 да 800 злотых.

У канцы 2025 года былі праведзеныя ператрусы на тэрыторыі некалькіх населеных пунктаў, уключаючы Варшаву і Кракаў, затрыманыя тры грамадзяніны Украіны. Кіраўніком групы называюць 42-гадовага ўкраінца. У яго было канфіскавана 87 тыс. злотых. Пазней было ўстаноўлена, што мужчына атрымаў даход ад дзейнасці групы ў памеры не менш за 1,2 млн злотых.

У далейшым былі праведзеныя і іншыя затрыманні, у тым ліку шэсць чалавек былі затрыманыя на мінулым тыдні.

Усяго абвінавачанні па справе выстаўленыя 19 грамадзянам Украіны, тром грамадзянам Малдовы і аднаму грамадзяніну Грузіі. У гэты лік уваходзяць як члены групы, так і замежнікі, якія скарысталіся падробленымі дакументамі.

Памежнікі не выключаюць новых затрыманняў.