Фото: Пул первого
У Офісе прэзідэнта Украіны адрэагавалі на сённяшнюю прапанову Аляксандра Лукашэнкі пра сустрэчу з Уладзімірам Зяленскім для абмеркавання двухбаковых адносін, піша “РБК-Украіна”.
Саветнік украінскага лідара Дзмітрый Літвін заявіў, што словы Лукашэнкі нічога не значаць яшчэ з 2022 года, калі Беларусь стала плацдармам для расійскай агрэсіі.
«Таму сочым за яго дзеяннямі. Лукашэнка мае звычку крыху тупавата прыдумляць постфактум, адкуль на яго “рыхтаваўся напад”. Пра што тут гаварыць», — сказаў ён.
Акрамя таго, Літвін распавёў, што Зяленскі сёння быў у Славуцічы, паблізу мяжы з Беларуссю, і меў зносіны па пытаннях бяспекі.
Нагадаем, прапанова Лукашэнкі прагучала пасля назірання за трэніроўкай па ўжыванні ядзернай зброі.
«Калі ён хоча пра нешта пагаварыць, параіцца ці яшчэ нешта, калі ласка, мы адкрытыя для гэтага. У любой кропцы — Украіны, Беларусі — я гатовы з ім сустрэцца і абмеркаваць праблемы беларуска-ўкраінскіх адносін. І, можа, пагаварыць пра перспектывы. Чамусьці з амерыканцамі, немцамі, палякамі, літоўцамі і латышамі ў нас ёсць пра што размаўляць, а з Украінай няма пра што…», — заявіў ён.
Лукашэнка таксама пракаментаваў заявы Уладзіміра Зяленскага пра магчымае ўцягванне Беларусі ў вайну.
«Будзе ўцягнутая толькі ў адным выпадку — калі на нашу тэрыторыю будзе здзейсненая агрэсія. І тут ужо не ўцягнутая (вы чулі з вуснаў прэзідэнта Расіі) — мы будзем разам абараняць нашу Айчыну ад Брэста да Уладзівастока, дзе размешчаныя дзве дзяржавы», — заявіў ён.