У Беларусі вызначылі правілы працы філіялаў замежных рэйтынгавых агенцтваў

Праўленне Нацбанка Беларусі вызначыла правілы працы філіялаў замежных рэйтынгавых агенцтваў у Беларусі. Адпаведныя пастановы былі падпісаныя 20 ліпеня старшынёй праўлення Раманам Галоўчанкам.

Дакументы ўстанаўліваюць парадак адкрыцця і спынення дзейнасці філіялаў замежных рэйтынгавых агенцтваў, вядзення іх рэестра, патрабаванні да дзейнасці філіялаў, а таксама парадак ажыццяўлення Нацбанкам адміністрацыйных працэдур па адкрыцці філіяла і спыненні яго дзейнасці.

Філіял агенцтва будзе лічыцца адкрытым і атрымае права ажыццяўляць рэйтынгавую дзейнасць з даты прыняцця Нацбанкам адпаведнага рашэння і ўключэння ў рэестр. Нацбанк будзе правяраць, ці адпавядаюць беларускаму заканадаўству агенцтва, якое адкрывае філіял, назва самога філіяла, а таксама яго сайт.

Для адкрыцця філіяла замежнае рэйтынгавае агенцтва павінна выканаць шэраг патрабаванняў:

• наяўнасць у дзяржаве яго рэгістрацыі прававога рэгулявання рэйтынгавай дзейнасці;
• наяўнасць упаўнаважанага органа рэгулявання і (або) нагляду;
• пацверджаны досвед рэгулярнай рэйтынгавай дзейнасці агенцтва на працягу не менш як 5 гадоў.

«У цэлым пры рэгуляванні дзейнасці філіялаў будуць выкарыстоўвацца падыходы, аналагічныя тым, якія рэалізаваныя Нацбанкам пры рэгуляванні рэйтынгавай дзейнасці беларускіх рэйтынгавых агенцтваў, але з улікам спецыфікі дзейнасці філіялаў», — паведамляе прэс-служба Нацбанка.

Пастановы ўступаюць у сілу пасля афіцыйнага апублікавання.