На Сусветным эканамічным форуме ў Давосе адбылася цырымонія падпісання статута Савета міру. Подпісы пад дакументам паставіў прэзідэнт ЗША Дональд Трамп, а таксама прысутныя на цырымоніі лідары краін, якія раней прынялі запрашэнне Дональда Трампа: Аргенціны, Арменіі, Азербайджана, Балгарыі, Інданезіі, Венгрыі, Іарданіі, Казахстана, Косава, Пакістана, Парагвая, Катара, Узбекістана, Манголіі. Турцыя, ААЭ і Саудаўская Аравія былі прадстаўлены на ўзроўні міністраў і прадстаўнікоў МЗС.
“Віншую, прэзідэнт Трамп. Статут афіцыйна ўступіў у сілу, і «Савет міру» цяпер з’яўляецца афіцыйна заснаванай міжнароднай арганізацыяй”, — заявіла пасля падпісання вядучая цырымоніі, прэс-сакратар Трампа Кэралайн Левіт.
Выступаючы перад падпісаннем дакумента, Дональд Трамп заявіў, што ён будзе старшынёй савета. Паводле яго слоў, арганізацыя будзе ўзаемадзейнічаць з ААН.
“Гэта вельмі хвалюючы дзень, да якога мы доўга ішлі; многія краіны ўжо атрымалі запрашэнні, усе хочуць быць часткай гэтага, і мы будзем працаваць з многімі партнёрамі, уключаючы Арганізацыю Аб’яднаных Нацый”, — сказаў ён.
Трамп таксама падкрэсліў, што былі ўрэгуляваныя восем канфліктаў. Ён выказаў упэўненасць, што хутка будзе ўрэгуляваны яшчэ адзін. Трамп заявіў, што падключыцца да ўрэгулявання спрэчкі паміж Егіптам і Эфіопіяй.
Прэзідэнт ЗША заявіў пра значны прагрэс ва Украіне, чарговы раз адзначыўшы, што ўрэгуляванне канфлікту паміж РФ і Украінай аказалася самым складаным.
“Вайна ў Газе, якая, па сутнасці, падыходзіць да канца. У нас ёсць невялікія ачагі ўзгарання, якія мы патушым, але яны нязначныя. Раней гэта былі гіганцкія, велізарныя, маштабныя пажары, а цяпер яны ператварыліся ў невялікія ачагі. Мы можам патушыць іх вельмі лёгка”, — сказаў ён.
“Калі ХАМАС не зробіць тое, што яны абяцалі зрабіць, а я думаю, яны, напэўна, зробяць… Але яны павінны скласці зброю, бо калі яны гэтага не зробяць, гэта будзе іх канец”, — дадаў Трамп.
Паводле яго слоў, сектар Газа будзе дэмілітарызаваны, а тэрыторыя атрымае належнае кіраванне і будзе адноўленая.
Трамп адзначыў, што Іран гатовы і хоча весці перамовы.
“Мы збіраемся ўсталяваць мір ва ўсім свеце, і, Божа мой, гэта было б вялікай спадчынай для ўсіх нас”, — сказаў ён.
