Тэмпы росту рэальных даходаў насельніцтва крыху знізіліся па выніках мая

Рэальныя наяўныя грашовыя даходы насельніцтва Беларусі ў студзені — маі выраслі на 7,9% у параўнанні з аналагічным перыядам мінулага года. Тэмпы росту рэальных даходаў крыху знізіліся. У студзені — красавіку яны складалі 8%. Для параўнання: за 2025 год паказчык павялічыўся на 9,6%.

Афіцыйным прагнозам сацыяльна-эканамічнага развіцця на 2026 год, зацверджаным указам Лукашэнкі, прадугледжаны рост даходаў насельніцтва на 4,8%.

Структура грашовых даходаў у студзені — маі 2026 года выглядала наступным чынам:

• аплата працы — 66,1%;
• трансферты насельніцтву (пенсіі, дапамогі, стыпендыі і іншыя трансферты насельніцтву) — 22,5%;
• даходы ад прадпрымальніцкай і іншай дзейнасці, якая прыносіць даход, — 6,7%;
• даходы ад уласнасці і іншыя даходы — 4,7%.

У структуры даходаў вырасла доля аплаты працы, але пры гэтым знізіліся долі астатніх крыніц.

Рэальныя наяўныя грашовыя даходы ўяўляюць сабой грашовыя даходы за вылікам падаткаў, збораў і ўзносаў, скарэкціраваныя на індэкс спажывецкіх цэн на тавары і паслугі.