Фото: пресс-секретарь правительства
Генпракуратура распавяла пра прысуд па справе аб карупцыі ў шыннай галіне. Усяго па ім праходзілі 9 службовых асоб. Назва прадпрыемства ў паведамленні наўпрост не ўказваецца, аднак у Беларусі ёсць адзіны вытворца шын – “Белшына”.
“Устаноўлена, што абвінавачаныя з 2017 года па ліпень 2024 года сістэматычна атрымлівалі хабар за бесперабойную адгрузку шыннай прадукцыі прадпрыемства ў адрас суб’екта тавараправодзячай сеткі ў г. Маскве для наступнай рэалізацыі канчатковым спажыўцам у Расійскай Федэрацыі. Агульная сума хабару, атрыманая ўсімі ўдзельнікамі арганізаванай групы, склала больш за 17 млн рублёў.
Акрамя таго, у судовым пасяджэнні ўстаноўлена перавышэнне былым генеральным дырэктарам прамысловага прадпрыемства службовых паўнамоцтваў, будучы асобай, якая займае адказнае становішча, здзейсненае з карыслівай і іншай асабістай зацікаўленасці, што пацягнула цяжкія наступствы ў выглядзе шкоды прадпрыемству.
Так, з 2020 года па 2023 год ён заключыў з расійскай кампаніяй дыстрыб’ютарскае пагадненне на пастаўку звышбуйнагабарытных шын, якія рэалізоўваліся ніжэй сабекошту. У сваю чаргу контрагент як пасярэднік рэалізоўваў шыны беларускай вытворчасці канчатковым спажыўцам з высокай гандлёвай нацэнкай. Сваімі дзеяннямі былы кіраўнік акцыянернага таварыства прычыніў шкоду прадпрыемству на суму больш за 9 млн рублёў”, – гаворыцца ў паведамленні пракуратуры.
Асноўныя тэрміны атрымалі былы дырэктар беларускага прадпрыемства, а таксама дырэктар тавараправодзячай сеткі, які прызнаны кіраўніком арганізаванай групы. Ім прызначана пакаранне ў выглядзе пазбаўлення волі на тэрмін па 14 гадоў са штрафам у памеры 5000 базавых велічынь (225 тыс. рублёў) з пазбаўленнем права займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў, на тэрмін 5 гадоў кожнаму.
Іншыя фігуранты справы асуджаны на пазбаўленне волі на тэрміны ад 3 да 8 гадоў са штрафам у памеры ад 1000 да 5000 базавых велічынь (ад 45 тыс. да 225 тыс. рублёў) і з пазбаўленнем права займаць пасады, звязаныя з выкананнем арганізацыйна-распарадчых і адміністрацыйна-гаспадарчых абавязкаў, на 5 гадоў.
З былога гендырэктара прадпрыемства спагнаны прычынены яго дзеяннямі шкода ў суме больш за 11 млн рублёў.
Прысуд у законную сілу не ўступіў, можа быць абскарджаны і апратэставаны ў апеляцыйным парадку.