Фото: unsplash.com
Грамадзянін Украіны, які падазраецца ў датычнасці да выбухаў на “Паўночных патоках” і быў затрыманы ўчора ў Харватыі па нямецкім запыце, мог знаходзіцца ў краіне на здымках фільма, прысвечанага дыверсіі 2022 года. Пра гэта піша нямецкі партал LTO.
Учора нямецкая пракуратура абвясціла пра затрыманне ў Харватыі грамадзяніна Украіны, дайвера, які прымаў удзел ва ўсталяванні выбуховых прылад на газаправодах. У рэлізе пракуратуры ён быў пазначаны як Vladimir Z. Паводле інфармацыі СМІ, гаворка ідзе пра Уладзіміра Жураўлёва, інструктара падводнага плавання, якога летась ужо затрымлівалі ў Польшчы, аднак польскі суд адмовіў у яго экстрадыцыі.
Паводле інфармацыі LTO, мужчына мог быць арыштаваны падчас здымак фільма “Змяіны востраў” з удзелам Шона Пэна і Эдрыена Броўдзі, які натхнёны падзеямі, звязанымі з выбухамі “Паўночных патокаў”. Раней паведамлялася, што фільм рэжысёра Дага Лаймана прысвечаны сакрэтнай групе ўкраінскіх дайвераў, якія адпраўляюцца на небяспечную падводную місію на фоне абвастрэння напружанасці паміж Расіяй і Украінай. Здымкі першапачаткова праходзілі ў сталіцы Харватыі Заграбе, аднак потым перамясціліся на ўзбярэжжа, верагодна, для здымак падводных сцэн, якія вяліся ў тым ліку ў Пуле, дзе быў затрыманы грамадзянін Украіны.
LTO не ўказвае, чым мог займацца затрыманы падчас здымак, а таксама не прыводзіць прамых доказаў яго ўдзелу ў іх.
Трэба адзначыць, што адвакат Уладзіміра Жураўлёва, які абараняў яго ў Польшчы, у каментары для PAP абверг чутку пра паездку ўкраінца на адпачынак у Харватыю.
«Я не ведаю прычын, па якіх ён туды паехаў, але мяркую, што яны былі істотнымі і важнымі», — сказаў ён.