Смаргонская школьніца выбрала небяспечны спосаб прагуляць кантрольную

Рэдакцыя Reform.news · 26 лютага 2026, 09:30

https://reform.news/be/smargonskaja-shkolnica-vybrala-nebjaspechny-sposab-praguljac-kantrolnuju/

Смаргонская школьніца выбрала небяспечны спосаб прагуляць кантрольную. 14-гадовая дзяўчынка выпіла 20 таблетак “Парацэтамолу”. Яна трапіла ў бальніцу з атручэннем. Пра выпадак расказалі ў ГКСЭ.

Выпіўшы вялікую дозу лекаў, дзяўчынка адчула млоснасць і галавакружэнне. Пра гэта яна паведаміла маці, якая выклікала хуткую.

“Згодна з высновамі судовага эксперта, у непаўналетняй выяўлена атручэнне парацэтамолам з развіццём вострага таксічнага гепатыту і пячоначнай энцэфалапатыі лёгкай ступені, якое вызначаецца як лёгкае цялеснае пашкоджанне па прыкмеце кароткачасовага расстройства здароўя”, – расказалі ў ГКСЭ.

Сілавікам, якія зацікавіліся інцыдэнтам, дзяўчынка патлумачыла, што яна хацела пагоршыць сваё самаадчуванне для таго, каб не пайсці ў школу на кантрольнае выпрабаванне.

“Для здароўя пацыенткі гісторыя скончылася шчасліва – пасля аказання медыцынскай дапамогі яе выпісалі з установы аховы здароўя”, – дадалі ў ГКСЭ.

Ці меў учынак доўгатэрміновыя наступствы для здароўя дзяўчынкі, не ўдакладняецца.