Рыбакоў: ЗША паставілі ўмовы для вяртання амбасады ў Мінск

Рэдакцыя Reform.news · 26 кастрычніка 2026, 08:08

https://reform.news/be/rybako-zsha-pastavili-movy-dlja-vjartannja-ambasady-minsk/

ЗША выставілі беларускім уладам некаторыя ўмовы, пры якіх амбасада краіны можа вярнуцца ў Мінск. Пра гэта беларускаму тэлебачанню заявіў пастаянны прадстаўнік Беларусі пры ААН Валянцін Рыбакоў.

“Амбасада амерыканская афіцыйна ніколі не закрывалася. Яна з’ехала з Беларусі, пакінула Беларусь, пераехала ў Літву. Як яны тады, як амерыканскі бок тады сцвярджаў, у сувязі з пытаннямі бяспекі, таму што пачалася… Пачаліся ваенныя дзеянні на тэрыторыі суседняй Украіны. І, зразумела, пад гэтай падставай яны перабраліся ў Літву. Амерыканскія дыпламаты маюць усе неабходныя дакументы, маюць візы, маюць усе дазволы. Што тычыцца вяртання амбасады, амерыканцы перад намі паставілі, перад беларускім бокам паставілі пэўныя пытанні, якія, з іх пункту гледжання, дазволяць ім цалкам перабрацца ў Мінск. Пытанні вырашаюцца насамрэч”, – сказаў ён.

Таксама Рыбакоў адказаў на пытанне аб арганізацыі прамых авіязносін з ЗША. Паводле яго слоў, працэс атрымання дазволаў – вельмі працяглы.

“Што тычыцца рэйса, пытанне вельмі-вельмі працяглае. Як казахстанскія авіялініі адкрываюць свой рэйс у ЗША? Працэс у іх працягваецца на сённяшні момант ужо восем гадоў. Таму што для таго, каб адкрыць прамы рэйс, неабходна вырашыць цэлы шэраг розных пытанняў. Гэта і пытанні бяспекі, і пытанні сертыфікацыі і самалётаў, і пілотаў, асабовага складу аэрапорта, і гэтак далей, і гэтак далей, і гэтак далей. Таму, вы ведаеце, ну, мы працуем. Гэта таксама адно з тых пытанняў, якія мы пастаянна абмяркоўваем”, – сказаў ён.

***

У снежні 2025 года Лукашэнка заяўляў, што сярод пытанняў, якія абмяркоўваюцца, — аднаўленне працы амерыканскай амбасады ў Мінску. Бакі не маглі дамовіцца аб ахове амбасады і аб штаце.

«Тое, пра што мы не дамовіліся — аб колькасці. Яны кажуць, вось, тут марскія пехацінцы, у нас парадак такі, ахоўваць амбасаду павінны нашы. Я кажу: дзякуй, не трэба. У нас Кубракоў забяспечыць усякую ахову лепш за марскіх. Трэба — Церцеля падключым, Хрэніна, але марскія пехацінцы амерыканскія нам не патрэбныя. Думаюць», — распавёў тады Лукашэнка.

«Далей яны паставілі пытанне, а можам мы наняць там з вашага ліку супрацоўнікаў, каб з Амерыкі не везці. Церцель [кіраўнік КДБ Іван Церцель — заўв. Reform.news] прысутнічаў на гэтай сустрэчы. Я кажу: вось Іван вам дасць колькасць нашых, якіх вы можаце наняць», — заяўляў Лукашэнка летась.