Рэальныя даходы насельніцтва за 2025 год выраслі на 9,6%

Рэальныя наяўныя грашовыя даходы насельніцтва ў 2025 годзе выраслі на 9,6%. Тэмпы іх росту запаволіліся пад канец года. Так, у студзені–лістападзе рост даходаў складаў 9,9%. На пачатку мінулага года даходы раслі з тэмпамі больш за 13%.

Для параўнання, за ўвесь 2024 год даходы выраслі на 9,7%. Разам з тым дынаміка даходаў насельніцтва перавысіла план, вызначаны ўказам Лукашэнкі, больш чым у два разы. Мэтавы паказчык па росце даходаў насельніцтва на мінулы год быў запланаваны ў 4%.

Структура грашовых даходаў у 2025 годзе выглядала наступным чынам:

• аплата працы — 66,3%;
• трансферты насельніцтву (пенсіі, дапамогі, стыпендыі і іншыя трансферты насельніцтву) – 21,9%;
• даходы ад прадпрымальніцкай і іншай дзейнасці, што прыносіць даход, – 7,3%;
• даходы ад уласнасці і іншыя даходы – 4,5%.

Рэальныя наяўныя грашовыя даходы ўяўляюць сабой грашовыя даходы за вылікам падаткаў, збораў і ўзносаў, скарэкціраваныя на індэкс спажывецкіх цэн на тавары і паслугі.