Дейвидас Матуленис. Фото: flickr.com/photos/internationaltransportforum/
Літоўская разведка ў цяперашні час не фіксуе ўзмацнення ваеннай пагрозы з боку Беларусі. Пра гэта заявіў галоўны дарадца прэзідэнта Літвы па пытаннях нацыянальнай бяспекі Дэйвідас Матулёніс у эфіры LRT.
«Я спецыяльна сёння цікавіўся дадаткова, у нашых службаў такой інфармацыі няма. З боку Беларусі на сённяшні дзень мы не бачым узрослай пагрозы. Так, ёсць пэўныя расійскія ваенныя аб’екты, але новых манеўраных частак, якія ўяўлялі б прамую пагрозу Літве, Латвіі або Польшчы, мы дакладна не бачым», – заявіў ён.
На думку Матулёніса, Аляксандр Лукашэнка цяпер, мяркуючы па ўсім, не зацікаўлены ў прамым удзеле ў вайне Расіі супраць Украіны і спрабуе аднавіць адносіны з Захадам і ЗША.
«З іншага боку, не падобна, што на сённяшні дзень Лукашэнка вельмі зацікаўлены ў прамым удзеле ў вайне Расіі супраць Украіны. Ён спрабуе балансаваць, аднавіць адносіны з Захадам, з ЗША. Таму ні палітычна, ні практычна мы не бачым дадатковых пагроз з боку Беларусі», – адзначыў ён.
Заява прагучала пасля візіту ў Літву Святланы Ціханоўскай. У інтэрв’ю 15min, апублікаваным у чацвер, лідар дэмсіл заявіла, што атрымлівае інфармацыю пра будаўніцтва новай ваеннай інфраструктуры ў Беларусі як каля мяжы з Украінай, так і каля межаў з дзяржавамі ЕС. Паводле яе слоў, Ціханоўская Лукашэнка гатовы даць Расіі тэрыторыю і інфраструктуру Беларусі для магчымых аперацый супраць краін НАТА або для ціску на Альянс.
Матулёніс заявіў, што літоўскія спецслужбы ўважліва сочаць за сітуацыяй у Беларусі і адразу адрэагуюць на магчымае павелічэнне расійскай ваеннай прысутнасці.
«Калі б быў заўважаны рост колькасці расійскіх войскаў, а мы б гэта лёгка заўважылі… загарэліся б трывожныя лямпачкі, якія патрабуюць дзеянняў на нацыянальным узроўні і ўзроўні Альянсу. Але ў гэты момант мы не можам пацвердзіць сцвярджэнні Ціханоўскай», – сказаў ён.
У той жа час дарадца прэзідэнта лічыць, што Літве не варта імкнуцца да аднаўлення палітычных адносін з беларускімі ўладамі. Аднак, на яго думку, каналы камунікацыі неабходна захоўваць, каб не дапусціць эскалацыі.
«Гэта не абавязкова павінен быць высокі палітычны ўзровень. Нават у праціўнікаў гістарычна заўсёды былі каналы камунікацыі, таму тут я не бачу праблемы», – сказаў дарадца прэзідэнта.
«Што датычыцца аднаўлення адносін з Беларуссю, узнікае рытарычнае пытанне — навошта? Мы не бачым добрай волі ў дачыненні да нас, і Беларусь працягвае падтрымліваць вайну Расіі супраць Украіны. Час для пацяплення ў адносінах яшчэ не прыйшоў», – дадаў ён.