Пракуратура разабралася ў забруджванні ракі Дзітва

Рэдакцыя Reform.news · 20 ліпеня 2026, 10:08

https://reform.news/be/prakuratura-razabralasja-zabrudzhvanni-raki-dzitva/

Пракуратура адсправаздачылася пра расследаванне інцыдэнту на рацэ Дзітва ў Лідскім раёне. Пра яе забруджванне паведамлялася на пачатку месяца.

Як расказалі ў пракуратуры, вынікі экспертызы пробаў вады з ракі паказалі перавышэнне нарматываў дапушчальных канцэнтрацый забруджвальных рэчываў. Прычынай гэтага стаў скід сцёкавых вод з камунальных ачышчальных збудаванняў у водны аб’ект. Ачышчальныя збудаванні знаходзяцца на стадыі мадэрнізацыі.

Паводле вынікаў разбору Лідская гарадская і раённая інспекцыя прыродных рэсурсаў і аховы навакольнага асяроддзя распачала адміністрацыйны працэс у дачыненні да вінаватай асобы. Праводзіцца ацэнка шкоды навакольнаму асяроддзю. Райвыканкаму прадпісана аператыўна завяршыць рэканструкцыю ачышчальных збудаванняў.