Папа Рымскі заклікаў да гуманітарнага перамір’я ў Алешках у размове з Зяленскім

Рэдакцыя Reform.news · 19 кастрычніка 2026, 20:25

https://reform.news/be/papa-rymski-zaklika-da-gumanitarnaga-peramir-ja-aleshkah-u-razmove-z-zjalenskim/

Папа Рымскі Леў XIV і прэзідэнт Украіны Уладзімір Зяленскі правялі тэлефонную размову 19 кастрычніка.

Бакі абмеркавалі сітуацыю ў акупаваным Расіяй горадзе Алешкі ў Херсонскай вобласці. Папа Рымскі заявіў, што накіраваў Уладзіміру Пуціну просьбу аб гуманітарным перамір’і.

«Папа выказаў надзею, што супрацоўніцтва абодвух бакоў дазволіць забяспечыць дастаўку харчовай і медыцынскай дапамогі, а таксама добраахвотную і бяспечную эвакуацыю грамадзянскага насельніцтва», — паведамляе Vatican News.

У размове Леў XIV пацвердзіў прыхільнасць Ватыкана да справы дыялогу і міру.

Нагадаем, на мінулым тыдні Папа Рымскі правёў тэлефонную размову з Пуціным.