Фото: Joshua Reddekopp / Unsplash.com
Сіноптыкі ў чарговы раз распаўсюдзілі штармавое папярэджанне з аранжавым узроўнем небяспекі.
«Раніцай і ўдзень 29 мая (пятніца) у многіх раёнах рэспублікі і ў Мінску чакаецца ўзмацненне паўночна-заходняга ветру парывамі 15-20 м/с», — гаворыцца ў паведамленні.
Аранжавы ўзровень пагоднай небяспекі дзейнічае ў Беларусі на працягу тыдня. Учора парывы ветру дасягалі хуткасці 26 м/с. Паводле інфармацыі МНС, адбылося 229 выпадкаў падзення дрэў ва ўсіх рэгіёнах, акрамя Брэсцкай вобласці.
У найбліжэйшыя дні пагодныя ўмовы на тэрыторыі Беларусі будзе вызначаць халодная няўстойлівая паветраная маса, якая паступае з паўночнага захаду Еўропы. 29 мая чакаецца ноччу пераменная воблачнасць, удзень воблачна з праясненнямі.
На большай частцы тэрыторыі краіны пройдуць кароткачасовыя дажджы. Удзень у асобных раёнах рэспублікі прагрымяць навальніцы. Тэмпература паветра мінімальная ноччу +3… +8°С, максімальная ўдзень ад +8°С па паўночным усходзе да +19°С па паўднёвым захадзе.