Владислав Татаринович. Фото: Совет Республики
Новым міністрам фінансаў Беларусі стаў Уладзіслаў Татарыновіч. Адпаведнае прызначэнне сёння зрабіў Аляксандр Лукашэнка. Да гэтага Татарыновіч быў намеснікам старшыні Савета Рэспублікі. Ён змяніў на пасадзе міністра Юрыя Селіверстава, накіраванага паслом у Расію.
“Ён «грашовы чалавек». Ён добра ведае фінансавую працу. І я так адчуваю, што ўсё ж у парламенце яму некалькі цеснавата. Гэта, магчыма, нават не яго месца і не яго справа. І я падумаў пра тое, што паспрабуем яго на канкрэтнай, але знаёмай яму працы. Ён жа выхадзец цалкам з гэтых грошай — у Міністэрстве фінансаў працаваў”, — ахарактарызаваў Лукашэнка новага міністра.
“Чалавек умее і ведае тэму. Чаму б не скарыстацца яго гэтымі ведамі? Вельмі спадзяюся, што Уладзіслаў Вікенцьевіч, пакуль ён будзе тут працаваць, падрыхтуе добрых вучняў, якія падрастуць побач з ім. І мы заўсёды зможам, калі гэта будзе неабходна, вылучаючы яго на новую пасаду, яго вучням прапанаваць гэтую працу”, — працягнуў ён сваё настаўленне.
Паводле яго слоў, Татарыновіча рэкамендаваў і Селіверстаў.
“Раз станоўча, значыць, чалавек зможа працаваць міністрам фінансаў. Увогуле, грошы ён любіць, умее лічыць іх — дзяржаўныя грошы. І ўпэўнены, што свята будзе берагчы капейку і раскідвацца не будзе гэтымі грашыма”, — сказаў Лукашэнка.
Сапраўды, большая частка кар’еры Татарыновіча звязаная з Мінфінам. Ён працаваў у міністэрстве на розных пасадах. Так, з 2001 года быў начальнікам упраўлення падатковай палітыкі галоўнага ўпраўлення падатковай палітыкі і даходаў бюджэту, з 2009 года — намеснікам міністра фінансаў. У Савет Рэспублікі ён трапіў па квоце Аляксандра Лукашэнкі.