Кіраўнік Якуціі Айсен Нікалаеў і міністр эканомікі Беларусі Юрый Чабатар 8 верасня абмеркавалі пастаўкі беларускай тэхнікі, чыгуначную лагістыку, стварэнне алмазнага кластара і лічбавы кінапракат. Пра гэта паведаміла прэс-служба кіраўніка Рэспублікі Саха (Якуція).
На сустрэчы былі падведзены вынікі сёмага пасяджэння двухбаковай рабочай групы. Бакі таксама абмеркавалі рэалізацыю дамоўленасцей, дасягнутых Нікалаевым і кіраўніком Адміністрацыі Лукашэнкі Дзмітрыем Крутым на Усходнім эканамічным форуме.
Якуція разглядае закупкі кар’ерных самазвалаў БелАЗ, а таксама пасажырскага, камунальнага і сельскагаспадарчага транспарту. Паводле даных прэс-службы, у тэхніцы БелАЗ зацікаўлены горназдабыўныя прадпрыемствы рэгіёна.
Асобна абмяркоўваліся прамыя чыгуначныя пастаўкі беларускіх тавараў у Якуцію і праца прадстаўніцтва «Чыгункі Якуціі» ў Мінску. Паводле слоў Чабатара, такая схема скараціла тэрмін дастаўкі да двух тыдняў.
Яшчэ адной тэмай стаў магчымы ўдзел беларускіх прадпрыемстваў у стварэнні алмазнага кластара ў Якуціі. У прыватнасці, гаворка ішла пра выкарыстанне вопыту гомельскага прадпрыемства «Крышталь» у апрацоўцы каштоўных камянёў.
Таксама бакі разгледзелі супрацоўніцтва ў сферы высокіх тэхналогій і лічбавага кінапракату.