Изображение: Пул первого
Аляксандр Лукашэнка, вітаючы ў Мінску спецпасланніка прэзідэнта ЗША Джона Коўла, намякнуў яму на адкрыццё прамых авіязносін паміж Беларуссю і ЗША.
“Як быццам не было доўгага падарожжа ў вас. Усе бадзёрыя. Я вельмі рады, што ў вас настрой добры і выглядаеце вы бадзёра. Гэта, Джон, таму што вы, напэўна, да сяброў заляцелі спачатку, а не наўпрост у Беларусь. Пара ўжо прылятаць наўпрост да нас”, – сказаў ён, перадае яго прэс-служба.
“Так, гэта было б вельмі добра”, – адказаў Коул.
Далей Лукашэнка перайшоў да пытанняў парадку дня перамоў, прапаноўваючы абмеркаваць таксама і сітуацыю на Блізкім Усходзе.
Трэба адзначыць, што да пандэміі COVID-19 “Белавія” выношвала планы па прамых палётах у ЗША. У аэрапорце Мінска была рэканструявана ВПП. Аднак тады рэалізацыі планаў перашкодзіла пандэмія, пасадка ў Мінску самалёта Ryanair з Раманам Пратасевічам і Соф’яй Сапегай, пасля чаго былі ўведзены забароны на палёты “Белавія” ў ЕС, а затым і поўнамаштабнае ўварванне РФ ва Украіну. Акрамя таго, у беларускай авіякампаніі не было далёкамагістральных самалётаў. Аднак у мінулым годзе флот “Белавія” папоўнілі два Airbus A330, якія дазволілі адкрыць прамыя рэйсы ў Кітай, В’етнам, Тайланд, Шры-Ланку.