Былы міністр унутраных спраў Турцыі Ідрыс Наім Шахін даў паказанні ў судзе ў Анкары па справе рэлігійнага дзеяча Аліхана Курыша і ўзначаленага ім руху «Сулейманджылар» (Süleymancılar). У паказаннях згадваўся і адзін з сыноў Аляксандра Лукашэнкі.
Турэцкія ўлады абвінавачваюць кіраўнікоў «Сулейманджылар» у стварэнні злачыннай супольнасці, адмыванні сродкаў, махлярстве і фінансавых махінацыях. Па гучнай справе затрыманыя дзясяткі падазраваных.
Як паведамлялася раней, блізкія да Курыша людзі выкарыстоўвалі аўтамабілі, зарэгістраваныя на экс-міністра. У адным з аўтамабіляў у жніўні гэтага года перавозіліся загадкавыя трое грамадзян Беларусі з дыпламатычнымі пашпартамі. З паказанняў Шахіна вынікае, што сярод беларусаў быў адзін з сыноў Лукашэнкі.
У судзе Шахін заявіў, што прадаставіў зарэгістраваны на сваё імя аўтамабіль Audi Q7 для дэлегацыі, якая прыбыла з Беларусі. Гэты аўтамабіль трапіў у аварыю ў Бодруме. Каб беларускія госці не апынуліся ў цяжкім становішчы, Шахін прадаставіў ім іншы аўтамабіль, піша tv100.com.
Арганізацыяй арэнды аўтамабіляў і размяшчэннем беларусаў займаўся Омюр Юджэль. З паказанняў Юджэля, далучаных да справы, вынікае, што аўтамабіль быў атрыманы ім у Стамбуле. Пасля чаго ён адправіўся на ім у Бодрум разам з сынам Лукашэнкі і яго ахоўнікамі.
«Праблісковы маячок з аўтамабіля знялі і пакінулі яго дэлегацыі, а пазней аўтамабіль трапіў у аварыю», — паведамляе выданне. З публікацыі незразумела, ці знаходзіўся хто-небудзь з беларускай дэлегацыі ў машыне ў момант аварыі.
На судзе ў Шахіна таксама спыталі, ці вядома яму пра інфармацыю, накіраваную турэцкім уладам у 2011 годзе, пра шантаж турэцкіх бізнесменаў з выкарыстаннем дзяўчат з Беларусі. Шахін, які займаў пасаду кіраўніка МУС у 2011-2013 гадах, заявіў, што не валодае такімі данымі, але знаёмы з трыма асобамі, якія ў паведамленні пазначаныя як датычныя да схемы.
Інфармацыя пра трох грамадзян Беларусі з дыпламатычнымі пашпартамі ў справе супраць «Сулейманджылар» з’явілася на мінулым тыдні.
Паведамлялася, што трое грамадзян Беларусі прыляцелі ў Турцыю праз аэрапорт Бодрума 6 жніўня. Сістэма аўтаматычнага распазнавання аўтамабіляў зафіксавала, што 21 жніўня ўсе трое знаходзіліся ў машыне на маршруце Гюверджынлік — Торба. 21 жніўня ў Бурсе яны пераселі на іншы аўтамабіль, а 22 жніўня вылецелі з Турцыі ў Мінск.
Таксама паведамлялася, што грамадзяне Беларусі карысталіся дзвюма сім-картамі, якія за некалькі дзён да гэтага былі актываваныя на імя Омюра Юджэля.
Адзначым, што атачэнне Аляксандра Лукашэнкі не першы год адпачывае ў Бодруме. Для пералётаў часта выкарыстоўваецца ўрадавы бізнес-джэт EW-301PJ. У ліпені-жніўні гэтага года самалёт некалькі разоў лётаў з Мінска ў Бодрум і назад.
