Красноярск. Фото: .admkrsk.ru
У расійскім Краснаярску плануюць адкрыць генеральнае консульства Беларусі. Адпаведнае распараджэнне 3 ліпеня падпісаў старшыня расійскага ўрада Міхаіл Мішусцін.
Згодна з дакументам, размешчаным на партале прававой інфармацыі, консульская акруга новага консульства будзе ўключаць тэрыторыі Рэспублікі Бурація, Рэспублікі Саха (Якуція), Рэспублікі Тыва, Рэспублікі Хакасія, Забайкальскага і Краснаярскага краёў, а таксама Іркуцкай вобласці. Гэтыя рэгіёны адначасова выключаюцца з консульскай акругі пасольства Беларусі ў Расіі.
Прапанова аб адкрыцці консульства была ўзгоднена Міністэрствам замежных спраў Расіі з зацікаўленымі федэральнымі органамі выканаўчай улады, органамі ўлады рэгіёнаў і паўнамоцнымі прадстаўнікамі прэзідэнта ў Далёкаўсходняй і Сібірскай федэральных акругах. МЗС даручана ва ўстаноўленым парадку аформіць дамоўленасць з Беларуссю.
Ураду Краснаярскага краю рэкамендавана выдзеліць для генеральнага консульства службовыя і жылыя памяшканні на ўмовах арэнды або перадаць іх ва ўласнасць Беларусі, пры неабходнасці забяспечыць адвод зямельных участкаў пад будаўніцтва, а таксама вырашыць іншыя арганізацыйныя пытанні, звязаныя з размяшчэннем консульства.