Фото: t.me/tsikhanouskaya
Нобелеўскі лаўрэат Алесь Бяляцкі, дырэктар офіса ў Літве Дзяніс Кучынскі і дарадца Святланы Ціханоўскай па парламенцкім супрацоўніцтве Анатоль Лябедзька 23–24 красавіка правялі шэраг палітычных сустрэч у Літве.
Перамовы прайшлі з міністрам унутраных спраў Уладзіславам Кандратовічам, спікерам Сейма Літвы Юозасам Олекасам і віцэ-міністрам замежных спраў Аўдрай Плепітэ. У цэнтры ўвагі былі пытанні, якія датычацца дзясяткаў тысяч беларусаў у Літве, каля 50 000 з якіх маюць від на жыхарства.
Галоўнай тэмай стала інтэграцыя. Міністр унутраных спраў пацвердзіў, што беларусы ў Літве — гэта не толькі людзі ў выгнанні, але і патэнцыял для развіцця краіны. Асобна абмяркоўваліся пагрозы бяспекі для студэнтаў і выпускнікоў Еўрапейскага гуманітарнага ўніверсітэта і іх сем’яў. Літоўскі бок выказаў гатоўнасць выступаць у гэтым пытанні надзейным саюзнікам, паведамілі ў Офісе Ціханоўскай.
Літоўскія афіцыйныя асобы зноў падкрэслілі, што санкцыі накіраваны супраць рэжыму Лукашэнкі, а не супраць беларускага народа. Было падкрэслена, што паралельна з узмацненнем санкцыйнага ціску на рэжым Літва працягвае падтрымліваць беларускае дэмакратычнае супольніцтва.
Таксама абмяркоўвалася падтрымка беларускай ідэнтычнасці — адукацыя, дзіцячыя сады, гімназія імя Францыска Скарыны, Беларускі дом і іншыя грамадзянскія ініцыятывы. Дасягнута папярэдняя дамоўленасць аб магчымасці здачы экзаменаў на правы кіроўцы на беларускай мове ў Regitra. Гэта пытанне, якое даўно падымала беларуская дыяспара ў Літве.