Фото: united.group
Еўрапейскі банк рэканструкцыі і развіцця апублікаваў новы выпуск рэгіянальнага эканамічнага прагнозу.
Ацэнка росту беларускай эканомікі ў 2026 годзе зніжана на 0,2 п.п. Аналітыкі ЕБРР лічаць, што беларускі ВУП у гэтым годзе вырасце на 1,1%. У наступным годзе тэмпы росту паскорацца да 1,5%. Прагноз на 2027 год не пераглядаўся.
“ВУП скараціўся на 0,4% у гадавым вылічэнні за першыя тры месяцы 2026 года з-за зніжэння аб’ёмаў прамысловай вытворчасці і стагнацыі ўраджайнасці сельскагаспадарчых культур. Спад у апрацоўчай прамысловасці падкрэслівае захаванне праблем, у тым ліку скарачэнне магчымасцей экспарту ў Расію і абмежаванае фінансаванне імпартазамяшчэння. Гадавая інфляцыя дасягнула піка ў 7,4% у ліпені 2025 года, паступова знізіўшыся да 5,4% у сакавіку 2026 года.
Дэфляцыя ў значнай ступені падтрымлівалася кантролем цэн на прадукты харчавання. Чакаецца, што эканамічны рост застанецца млявым у кароткатэрміновай перспектыве, дасягнуўшы 1,1% у 2026 годзе і 1,5% у 2027 годзе. Эканамічныя санкцыі і залежнасць Беларусі ад расійскай эканомікі ўяўляюць сабой значныя рызыкі запаволення тэмпаў росту”, — гаворыцца ў дакуменце.
Нагадаем, ВУП Беларусі па выніках студзеня—красавіка вярнуўся да росту, павялічыўшыся на 0,2%. Пры гэтым афіцыйны прагноз, зацверджаны ўказам Аляксандра Лукашэнкі, прадугледжвае рост эканомікі ў гэтым годзе на 2,8%.
На фоне канфліктаў на Блізкім Усходзе ЕБРР таксама панізіў на 0,5 п.п. прагноз сукупнага росту эканомік свайго рэгіёна. Ён складзе 3,1%. Ацэнка на 2027 год зніжана на 0,1 п.п. да 3,6%.
ЕБРР лічыць канфлікт галоўным узрушэннем для рэгіянальнай эканамічнай сітуацыі.
“Рост цэн на нафту і газ, перабоі ў суднаходстве праз Армузскі праліў і павелічэнне разрыву паміж цэнамі на энерганосьбіты ў Еўропе і ЗША — цяпер ён перавышае пяціразовы паказчык для газу — негатыўна паўплывалі на канкурэнтаздольнасць і запаволілі эканамічны рост.
Цэны на электраэнергію ў Еўропе таксама застаюцца значна вышэйшымі, чым у Злучаных Штатах Амерыкі, што ўзмацняе доўгатэрміновыя структурныя зрухі ў прамысловай вытворчасці ў бок менш энергаёмістых сектараў”, — адзначаецца ў прагнозе.
ЕБРР не стаў пераглядаць прагноз росту расійскай эканомікі. У гэтым годзе ён ацэньваецца ў 0,8%, а ў наступным — у 1%.
У банку ацэньваюць рост эканомікі Літвы ў гэтым годзе ў 3% (-0,3 п.п. да папярэдняга прагнозу), Польшчы — у 3,5% (-0,2 п.п.), Латвіі — у 2% (-0,2 п.п.), Украіны — у 2,2% (-0,3 п.п.).