Еўракамісія прапанавала новы санкцыйны рэжым. Ён звязаны з міграцыяй

Еўракамісія і вярхоўны прадстаўнік ЕС па замежных справах і палітыцы бяспекі прапанавалі новы санкцыйны рэжым. Ён накіраваны на барацьбу з кантрабандай мігрантаў, гандлем людзьмі і іншымі сур’ёзнымі формамі арганізаванай злачыннасці, уключаючы незаконны абарот агнястрэльнай зброі і наркотыкаў, а таксама адмыванне грошай.

«Сёння мы прадстаўляем новы санкцыйны рэжым супраць кантрабандыстаў і гандляроў людзьмі, якія займаюцца незаконнай перавозкай мігрантаў. У нас ва ўсіх агульная мэта. Выціснуць іх з рынку і выратаваць жыцці тысяч людзей, якія мараць пра лепшае жыццё. Менавіта мы, у Еўропе, павінны вырашаць, хто да нас прыязджае і пры якіх абставінах», — заявіла старшыня Еўракамісіі Урсула фон дэр Ляен.

Санкцыі будуць уводзіцца на наступных падставах:

• незаконная дзейнасць, якая ажыццяўляецца па-за межамі ЕС і якая ў сілу свайго маштабнага, сістэматычнага або арганізаванага характару ўяўляе сур’ёзную пагрозу каштоўнасцям ЕС, бяспецы ЕС і яго дзяржаў-членаў або міжнароднай бяспецы;
• дзейнасць, звязаная з кантрабандай мігрантаў, гандлем людзьмі, незаконным абаротам наркотыкаў, незаконнай вытворчасцю і незаконным абаротам агнястрэльнай зброі і адмываннем грошай.

Санкцыі будуць уводзіцца ў дачыненні да асоб і арганізацый, якія ўдзельнічаюць у названай дзейнасці. Яны будуць уключаць замарожванне актываў, забарону на прадастаўленне сродкаў і іншых рэсурсаў, а таксама забарону на паездкі.

Цяпер новы санкцыйны рэжым павінны зацвердзіць Савет і дзяржавы-члены.