У Мінску будуць судзіць двух маладых людзей 21 і 23 гадоў. Абодва абвінавачваюцца ў злосным хуліганстве, а старэйшы — дадаткова ў распальванні сацыяльнай варожасці.
Як заяўляе пракуратура Мінска, абвінавачаныя з’яўляюцца «прыхільнікамі анархічных поглядаў».
Паводле версіі абвінавачання, у кастрычніку 2025 года і ў студзені 2026 года маладыя людзі плявалі на абеліск «Мінск – горад-герой», нецэнзурна выказваліся, выказвалі непрымальныя каментарыі і абразлівыя фразы ў адрас ветэранаў. Свае дзеянні абвінавачаныя здымалі на відэа і выкладвалі ў сацсетках.
«Фігуранты ўсведамлялі гістарычную значнасць і культурную каштоўнасць абеліска, пры гэтым сваімі дзеяннямі замахваліся на гістарычную памяць беларускага народа, дэманструючы вельмі пагардлівае стаўленне да памяці абаронцаў Айчыны», — заяўляе пракуратура.
Таксама ўстаноўлена, што 23-гадовы абвінавачаны ў кастрычніку 2022 года размясціў у Instagram «выяву з тэкстам, змест якога накіраваны на ўзбуджэнне ў людзей іншай сацыяльнай варожасці па прыкмеце тэрытарыяльнай прыналежнасці і паходжання».
Крымінальная справа накіравана ў суд. Маладыя людзі знаходзяцца пад вартай.