Встреча Александра Лукашенко со спецпосланником США в Беларуси Джоном Коулом в Минске. 12.12.2025. Фото: пресс-служба Лукашенко.
Спецыяльны пасланнік прэзідэнта ЗША па Беларусі Джон Коўл на наступным тыдні прыбудзе ў Вільнюс, а затым адправіцца ў Мінск. Пра гэта паведамляе Delfi са спасылкай на крыніцы.
Паводле даных літоўскага выдання, Коўл прыедзе ў Вільнюс 18 сакавіка, пасля гэтага ён адправіцца ў Мінск.
Папярэднія візіты Коўла ў беларускую сталіцу суправаджаліся аб’явамі пра паслабленне санкцый ЗША ў дачыненні да Лукашэнкі, а таксама вызваленнем палітвязняў, якіх пры гэтым вывозілі з Беларусі.
Нагадаем, у нядзелю Аляксандр Лукашэнка, наведваючы рэстаран хуткага харчавання сеткі Мак.бай, прагаварыўся, што чакае прыезду дэлегацыі з ЗША. Ён нават прапанаваў першаму віцэ-прэм’еру Мікалаю Снапкову звадзіць амерыканскую дэлегацыю ў аб’ект гэтай сеткі, якая працуе замест McDonald’s.
«Ну а цяпер хай амерыканцы прыйдуць і паглядзяць. Вось яны прыедуць да мяне, абавязкова іх прывезці сюды. Скажы, пойдзем у «Макдональдс» і прачытай: «МАК.бай. Беларускае». Беларусы працуюць, беларускае абсталяванне, беларускі прадукт. Ешце», — заявіў Лукашэнка.