Чарнагорыя рыхтуецца спыніць дзеянне пагаднення аб бязвізавым рэжыме з Беларуссю

Рэдакцыя Reform.news · 25 верасня 2026, 14:35

https://reform.news/be/charnagoryja-ryhtuecca-spynic-dzejanne-pagadnennja-ab-bjazvizavym-rjezhyme-z-belarussju/

Урад Чарнагорыі 24 верасня ўхваліў дакумент аб неабходнасці спыніць дзеянне пагадненняў, якія рэгулююць бязвізавы рэжым з Беларуссю, Расіяй і Турцыяй. Пра гэта гаворыцца ў паведамленні па выніках пасяджэння кабінета міністраў.

Ва ўрадзе патлумачылі гэты крок неабходнасцю прывесці візавую палітыку краіны ў адпаведнасць з правіламі Еўрасаюза ў рамках працэсу ўступлення ў ЕС. Яшчэ 23 ліпеня кабінет міністраў прыняў змены ў візавыя правілы, згодна з якімі з 1 лістапада 2026 года грамадзянам Беларусі, Расіі і Турцыі спатрэбіцца віза для ўезду ў Чарнагорыю, транзіту праз яе тэрыторыю і знаходжання ў краіне.

Паколькі бязвізавы рэжым з гэтымі дзяржавамі таксама замацаваны міжнароднымі пагадненнямі, урад лічыць неабходным пачаць працэдуру спынення іх дзеяння.

Для ўладальнікаў дыпламатычных, службовых і спецыяльных пашпартоў Турцыі Чарнагорыя мае намер заключыць новае асобнае пагадненне, каб па магчымасці захаваць для іх бязвізавы рэжым. Аналагічнай ініцыятывы ў дачыненні да Беларусі і Расіі ў паведамленні ўрада няма.