Зяленскі: Важна, каб падтрымка Украіны заставалася сярод прыярытэтаў амерыканскай палітыкі
Рэдакцыя Reform.news · 7 лістапада 2026, 13:55
https://reform.news/be/zjalenski-vazhna-kab-padtrymka-ukrainy-zastavalasja-sjarod-pryjarytjeta-amerykanskaj-palityki/Расія падчас камбінаванай атакі на Украіну ўжыла 172 беспілотнікі і 36 балістычных ракет. Усе ракеты былі накіраваны на Кіеў і Кіеўскую вобласць. Як паведаміў прэзідэнт Украіны Уладзімір Зяленскі, асноўнай мэтай удараў зноў стала энергетычная інфраструктура.
Паводле яго слоў, у выніку атакі ў Кіеве ўзніклі сур’ёзныя праблемы з электра-, вода- і цеплазабеспячэннем. Пашкоджаны жылыя дамы і Паўночны мост, часткова разбураны дзіцячы сад. У Кіеўскай вобласці расійскія войскі атакавалі падстанцыі, якія злучаюць Ровенскую і Хмяльніцкую атамныя электрастанцыі з Кіевам і цэнтральнымі рэгіёнамі Украіны.
Акрамя таго, пашкоджаны электрападстанцыі ў Вінніцкай, Жытомірскай, Ровенскай, Харкаўскай і Днепрапятроўскай абласцях. Усяго, акрамя Кіева, пад ударамі апынуліся яшчэ 12 рэгіёнаў Украіны. Пацярпелі 9 чалавек, у тым ліку дзіця. У пацярпелых рэгіёнах працягваюцца рамонтныя і выратавальныя работы там, дзе дазваляе сітуацыя з бяспекай.
“Расія рыхтуецца да трохбаковых перамоў, наносячы ракетныя ўдары па крытычнай інфраструктуры Украіны”, – заявіў украінскі лідар.
Ён заклікаў ЗША ўзмацніць падтрымку Украіны на фоне расійскіх удараў, якія працягваюцца. Паводле яго слоў, Украіна разлічвае на павелічэнне двухбаковай дапамогі з боку ЗША і ўзмацненне ўвагі амерыканскага Кангрэса.
“Дзякуй усім нашым людзям, якія штодня абараняюць краіну ад гэтага тэрору, аднаўляюць і робяць усё, каб Украіна перажыла зіму. Але калі Расія спрабуе пагрузіць Кіеў — шматмільённы горад — і ўсю краіну ў блэкаўт, нельга пакідаць Украіну сам-насам. Мы разлічваем на ўзмацненне двухбаковай падтрымкі з боку Амерыкі. Мы разлічваем на ўзмацненне ўвагі да Украіны з боку Кангрэса ЗША. Таму што Расія пастаянна павялічвае колькасць сваіх удараў”, – заявіў ён.
Зяленскі падкрэсліў важнасць захавання падтрымкі Украіны сярод прыярытэтаў амерыканскай палітыкі і заклікаў абедзве партыі ЗША да адзінства ў пытаннях бяспекі, асуджэння расійскай агрэсіі і ўзмацнення санкцыйнага ціску на Уладзіміра Пуціна.
“Важна, каб падтрымка Украіны заставалася сярод прыярытэтаў амерыканскай палітыкі. Разлічваем на адзінства абедзвюх партый у пытаннях бяспекі, падтрымкі Украіны, асуджэння расійскай агрэсіі і ўзмацнення санкцыйнага ціску на Пуціна. Рашучасць і паслядоўнасць Амерыкі ў падтрымцы Украіны маюць вялікае значэнне для набліжэння міру”, – заявіў украінскі лідар.