BYSOL запускае штогадовы збор для дзяцей палітвязняў

Фонд BYSOL запускае штогадовы збор для дзяцей палітвязняў. Ён прымеркаваны да Дня абароны дзяцей і пачатку летніх канікулаў.

Першапачатковая мэта збору складае 10 тысяч еўра, аднак можа змяняцца ў залежнасці ад колькасці атрыманых заявак на дапамогу. На кожнае дзіця да 16 гадоў абяцаюць выплаціць па 100 еўра.

Заяўкі на атрыманне дапамогі прымаюцца з 5 па 31 мая, іх могуць падаць бацькі, якія знаходзяцца ў Беларусі і за мяжой:

• сем’і палітвязняў з дзецьмі, у якіх адзін з бацькоў або абодва знаходзяцца пад вартай не менш за тры месяцы (у тым ліку на «хіміі» з накіраваннем або без);
• былыя палітвязні з дзецьмі, вызваленыя пасля 1 студзеня 2024 года;
• бацькі, якія адбываюць «хатнюю хімію» — пры ўмове, што яны маюць інваліднасць, альбо з’яўляюцца пенсіянерамі, альбо выхоўваюць дзяцей да трох гадоў.

“Як правіла, гэтыя грошы ідуць на пакупку летняга адзення, аплату дадатковых заняткаў, псіхалагічную дапамогу і арганізацыю адпачынку. У мінулым годзе падчас падобнай акцыі нам удалося сабраць сродкі для 252 дзяцей”, – паведамілі ў фондзе.