Былы сакратар КР расказаў, як яго прынялі за расійскага навукоўца з санкцыйнага спіса

Рэдакцыя Reform.news · 28 верасня 2026, 17:44

https://reform.news/be/byly-sakratar-kr-raskaza-jak-jago-prynjali-za-rasijskaga-navuko-ca-z-sankcyjnaga-spisa/

Былы сакратар Каардынацыйнай рады Беларусі Іван Краўцоў паведаміў, што пасля ўвядзення брытанскіх санкцый супраць яго поўнага цёзкі сутыкнуўся з блакіроўкамі акаўнтаў і дадатковымі праверкамі плацяжоў. Пра гэта ён напісаў 28 верасня ў Facebook.

6 ліпеня Вялікабрытанія ўнесла ў санкцыйны спіс Івана Сяргеевіча Краўцова — начальніка чацвёртага навукова-даследчага аддзела расійскага навуковага цэнтра «Сигнал». Лондан звязвае цэнтр з распрацоўкай хімічнай зброі. У брытанскім паведамленні прозвішча навукоўца пазначана як Kravstov.

Беларускі палітык Іван Краўцоў — Яўгенавіч. Паводле яго слоў, у дзень увядзення санкцый ён атрымаў паведамленні пра блакіроўку акаўнтаў Google, Wise і банкаўскіх сэрвісаў, а таксама іншых уліковых запісаў, звязаных з аплатай. Кампаніі запыталі ў яго імя па бацьку; некаторым для аднаўлення доступу хапіла адказу па электроннай пошце без пацвярджальных дакументаў.

Краўцоў таксама расказаў, што праверка яго SWIFT-пераводу на некалькі тысяч за межы ЕС заняла ў банка-карэспандэнта 17 дзён. Паводле яго слоў, 28 верасня ўдакладніць імя па бацьку перад продажам білета папрасіў і аўтобусны перавозчык Lux Express.

Палітык лічыць, што такія выпадкі звязаныя з недахопам даных для адрознення людзей з аднолькавымі імёнамі ў санкцыйным запісе. Краўцоў звярнуў увагу, што ў запісах ЕС пра некаторых супрацоўнікаў «Сигнала», якія трапілі пад санкцыі трыма днямі раней, прыведзена больш ідэнтыфікацыйных звестак. ЕС абвясціў пра тыя абмежаванні 3 ліпеня.

У 2020 годзе Іван Краўцоў быў членам выбарчага штаба Віктара Бабарыкі. Пазней ён стаў выканаўчым сакратаром Каардынацыйнай рады. У жніўні 2026 года Краўцоў пакінуў гэтую пасаду і вярнуўся да працы ў якасці дэлегата КР.