Былога дырэктара РЦАП па фрыстайле завочна асудзілі на 12 гадоў калоніі

Мінскі гарадскі суд 20 сакавіка вынес прысуд былому дырэктару Рэспубліканскага цэнтра алімпійскай падрыхтоўкі па фрыстайле Вадзіму Крывашэеву. Як паведаміў праваабарончы цэнтр “Вясна”, яму прызначана пакаранне ў выглядзе 12 гадоў пазбаўлення волі ў калоніі ва ўмовах узмоцненага рэжыму і штраф 1000 БВ (45 тыс. рублёў).

Нагадаем, у верасні 2020 года яго звольнілі з пасады за «дрэнную ідэалагічную працу ў калектыве». Крывашэеў быў прадстаўніком па спорце ў Народным антыкрызісным кіраванні (НАУ).

Ён абвінавачваўся па чатырох артыкулах:

• ч. 3 ст. 426 (у рэдакцыі Закона ад 09.01.2019 №171-З) аб перавышэнні ўлады або службовых паўнамоцтваў;
• ч. 1 ст. 357 (у рэдакцыі Закона ад 26.05.2021 №112-З) аб змове або іншых дзеяннях, здзейсненых з мэтай захопу ўлады;
• ч. 3 ст. 361 (у рэдакцыі Закона ад 14.12.2021 №133-З) аб закліках да прымянення санкцый або іншых дзеянняў, што шкодзяць нацыянальнай бяспецы;
• ч. 3 ст. 361-1 (у рэдакцыі Закона ад 26.05.2021 №112-З) аб стварэнні або ўдзеле ў экстрэмісцкім фарміраванні.