«Белспецзнештэхніка» прэтэндуе на кантракт па мадэрнізацыі верталётаў Мі-17 у Кот-д’Івуары

Рэдакцыя Reform.news · 24 верасня 2026, 12:16

https://reform.news/be/belspeczneshtjehnika-prjetjendue-na-kantrakt-pa-madjernizacyi-vertaljota-mi-17-u-kot-d-ivuary/

Беларуская дзяржаўная кампанія «Белспецзнештэхніка» (БСЗТ) можа ўзяць удзел у рамонце і мадэрнізацыі ваенна-транспартных верталётаў Мі-17, якія знаходзяцца на ўзбраенні Кот-д’Івуара. Пра гэта паведамляе выданне Africa Intelligence.

Паводле яго інфармацыі, у ліпені дэлегацыя БСЗТ правяла каля тыдня ў Кот-д’Івуары. Беларускія спецыялісты агледзелі два верталёты Мі-17 і перадалі прадстаўнікам сілавых структур краіны прапанову аб іх капітальным рамонце. Праект, у прыватнасці, прадугледжвае замену рухавікоў.

Цяпер генеральны штаб Кот-д’Івуара пад кіраўніцтвам генерала Ласіны Думбіі вывучае магчымасці рамонту і мадэрнізацыі наяўнай авіятэхнікі. Улады краіны адначасова чакаюць прыняцця закона аб ваенным планаванні, які павінен адкрыць узброеным сілам магчымасць закупляць новае абсталяванне.

Як раней пісала Africa Intelligence, у пачатку 2025 года Кот-д’Івуар атрымаў два верталёты Мі-17. Яны прызначаныя для ўзмацнення транспартнага авіяпарку краіны, які выданне характарызуе як параўнальна нешматлікі.

«Белспецзнештэхніку» ўзначальвае Ігар Велянцей. Дзяржаўная кампанія займаецца распрацоўкай, вытворчасцю, мадэрнізацыяй і экспартам прадукцыі і паслуг ваеннага прызначэння. У сферу яе дзейнасці ўваходзяць авіяцыйная і сухапутная тэхніка, сістэмы супрацьпаветранай абароны і стралковая зброя.

БСЗТ знаходзіцца пад санкцыямі Злучаных Штатаў і Еўрапейскага саюза. Амерыканскія абмежаванні ў дачыненні да кампаніі былі ўведзеныя ў сувязі з падтрымкай беларускімі ўладамі расійскай агрэсіі супраць Украіны.

Паводле звестак Africa Intelligence, візіт прадстаўнікоў БСЗТ праходзіў паралельна з перамовамі аб эканамічным супрацоўніцтве паміж Беларуссю і Кот-д’Івуарам, якія адбыліся ў Абіджане ў сярэдзіне ліпеня.

Беларускія інвестары, якія працуюць у аграрным сектары, сустрэліся з прадстаўнікамі івуарыйскага агенцтва па садзейнічанні інвестыцыям CEPICI і Нацыянальнага цэнтра агранамічных даследаванняў CNRA. Пасля гэтага адбылася сустрэча з міністрам сельскай гаспадаркі Кот-д’Івуара Бруна Набанье Конэ.

Арганізацыі перамоў садзейнічаў прэзідэнт івуарыйскага сельскагаспадарчага кааператыва CA VICA Аруна Канатэ. Першыя кантакты былі ўстаноўленыя на Пецярбургскім міжнародным эканамічным форуме, які праходзіў у пачатку чэрвеня.

Africa Intelligence таксама адзначае, што пры прасоўванні сваіх інтарэсаў у Афрыцы беларускія ўлады карыстаюцца сувязямі бізнесмена Аляксандра Зінгмана.

***

Ваенна-тэхнічныя сувязі Беларусі і Кот-д’Івуара маюць працяглую гісторыю. Як раней пісаў Reform.news, у жніўні 2018 года івуарыйскія вайскоўцы паказалі на парадзе восем браніраваных машын «Кайман» беларускай вытворчасці. Краіна стала першым вядомым замежным заказчыкам гэтай мадэлі. У лютым 2020 года ў Абіджан таксама прыбылі 12 беларускіх інструктараў для навучання жандараў падраздзялення, якое эксплуатуе колавую бронетэхніку.

Больш раннія эпізоды супрацоўніцтва суправаджаліся скандаламі. Беларускіх грамадзян звязвалі з авіяўдарам па французскім ваенным кантынгенце ў 2004 годзе, а ў 2011 годзе Мінск абвінавачвалі ў пастаўцы трох баявых верталётаў сілам Ларана Гбагбо у абыход эмбарга. Беларускія ўлады абодва разы адмаўлялі сваю датычнасць.